Mynjur ka JHADC da ka Resolution ban kyrpad ia ka President ban ai lad tih dewiong biang ha Jaintia

Ka Jaiñtia Hills Autonomous District Council (JHADC) ha ka Dorbar kyrpang ne ka Special Session ba la pynlong mynta ka sngi ka la mynjur ia ka Resolution ba la wanrah da u CEM ka council u Thombor Shiwat na bynta ban kyrpad ia ka President ka Ri ban pynkylla ia ka Mines and Minerals (Development and Regulation) Act, 1957 bad ka Mineral Concession Rules, 1960, ka Coal Mines (Special Provisions) Act, 2015 kata ban ai lad tih dewiong biang ha Rilum Jaiñtia Hills kumba ha ki por mynshwa.

U CEM bah Thombor Shiwat ula kdew katkum ka Paragraph 12A(b) jong ka Sixth Schedule ka Constitution ka Ri, ka President jong ka Ri India ka don ia ka bor ban pynlait ia ki aiñ ka Parliament na ki Autonomous District ka Jylla Meghalaya ne ban wanrah katkum ka jingibit ka President.

U ong ruh ba ka Supreme Court ha ka mukotduma jylla Meghalaya pyrshah ia ka All Dimasa Students Union, Dima-Hasao District Committee jong ka 3 tarik July 2019 ka la kren shai ba ki trai jaka ki don hok ia ka khyndew kumjuh ki mar ba don hapoh khyndew.

Shuh shuh ha ka Resolution la tyrwa ban don lai kyrdan ka rukom tih (Tiered Licensing Framework) ha Rilum Jaiñtia, kynthup ia ka Tier I na bynta kiba tih dewiong da ka bor shimet, ka kur ne ka longing, Tier II kiba tih dewiong medium-scale cooperative/partnership bad ka Tier III ban tih dewiong da ki karkhana.

Nangta la tyrwa ruh ban pyntreikam ia ki aiñ iada mariang kum ka Environment (Protection) Act, 1986; ka Water (Prevention and Control of Pollution) Act, 1974; ka Air (Prevention and Control of Pollution) Act, 1981; ka Forest (Conservation) Act, 1980; bad ki hukum ka National Green Tribunal kumjuh ka jong ka Supreme Court ka India.

Na ka liang ki MDC ka liang pyrshah ba kynthup ia u nongialam liang pyrshah u Awhai Andrew Shullai, u Madonbai Rymbai, u Rikut Pareiñ bad kiwei haba shim bynta ban iatai ki ong, ba ki khlem pyrshah ia ka Resolution tangba ki shuh dawa ban pynkylla katto katne ki bynta khnang ban ym shah ktah kylla ia ka Council bad kiba trei dewiong ha ki par barit.

Hadien ka jingiamir jingmut na ka liang u CEM ula pdiang ban pynkylla ia ki bynta ba donkam, kumta ha ka sien shong dorbar ba ar ha ka por shiteng sngi hadien ba la dep pynbeit ia kato katne ki bynta la mynjur bad pdiang ia ka Resolution da ka jingiahun lang ki liang pyrshah bad liang synshar.