Ka Bill jong ka KHADC ka pynkheiñ ia ka riti synshar ka Ri, ong u Bah Sanbor

U Myntri ka Sorkar Jylla u Bah Sanbor Shullai uba long ruh u MLA ka South Shillong ula leit iakynduh ia u Lat ka Jylla ban ai dorkhas halor ka jingpynkylla ka dorbar jong ka Khasi Hills Autonomous District Council (KHADC) ia ka Khasi Hills Autonomous District (Trading by Non-Tribals) (Amendment) Bill, 2026.

Ha ka dorkhas u Bah Sanbor ula pynpaw ia ka jingsngewkhia halor ka jingpynkylla ia ka Khasi Hills Autonomous District (Trading by Non-Tribals) (Amendment) Bill, 2026, ba la mynjur da ka iingdorbar ka KHADC bad kane ka Amendment Bill ka pyrshang ban pynlong kongsan ia baroh ki bym dei ki riewlum ba dei ki trai jylla ba dei ki nongtrei ban shim ia ka Service License ban ai kam ia ki bar jylla ba dei ki nongshong shnong ka jylla.

“Kane ka Bill kan treikam palat ia u pud jong ka Council. Kane ka Bill kaba la mynjur da ka KHADC kala iaid palat ia ka bor thawaiñ kumba la pynkup bor ia ka Autonomous District Councils hapoh jong ka Paragraph 10 jongka Sixth Schedule jong ka riti synshar ka ri bad kumta kala iaid palat ia ka bor jong ka riti synshar ka ri” la pynpaw u Bah Sanbor ha ka dorkhas.

“Kane ka aiñ kaba shisha kaba la don 72 snem kaba la tip kum ka Khasi Hills Autonomous District (Trading by Non-Tribals) Regulation Act, 1954 kadei kaba la mynjur ban pyrkhing ia ka jingkhaii pateng ki bar jylla bad ki nongkhaii ki bym dei ki riewlum haduh mynta kila bud ryntih ia ki ain ki bapher bapher kiba la pyntyreikam da ka Sorkar Jylla bad ki District Council” ula pynpaw.

Ula ong, ban pyrshang ban pyniar ia ka jingpyrkhing na ki nongkhaii laitluid sha ki kompani/ ki nongtrei jong ki riewshimet, ka KHADC kala pyntreikam ha ki jaka kiba long shabar jong ka jingpynkup bor jong ka riti synshar.

Ula bynrap lada kane ka Bill ka ioh ia ka jingmynjur, kan pynpaw shai kdar ia ka jinglong hok bad ia ka bor jong ka District Council sha ka jingtynjuh ha kaba iadei bad ki ain ki kanun bad kan plie ruh ia ka jingkhang ia kiba leh ia ki kam khaii pateng ban iakhun pyrshah ia ka bor jong ka Council ha ki iingkashari bad kan buh kylla ha ka jingma ia katei ka aiñ kaba la don mynta 72 snem naduh ba la thaw ia ka.

Ula ong ka Paragraph 12A ka Sixth Schedule jong ka riti synshar ka ri, kala kdew shai ba lada ka ain kaba la mynjur da ka District Council ka iatakhuh bad ka ain kaba la thaw da ka iing dorbar thawaiñ ka jylla, kumta ka aiñ jong ka jylla kan ieng bad ka aiñ kaba la thaw da ka District Council kan iap noh.

U la pynpaw ba ka “Trading by Non-Tribals” yn ym lah satia ban pyniar ban synshar ha kaba iadei bad ki nongaikam bad ki nongtrei. Kane ka Bill kadei ka jingpynkhein ia ka Article 14, Article 19(1)(g) bad Article 21 jong ka riti synshar ka ri.

U Bah Sanbor ula kyntu ia u Lat ka Jylla ban khmih bniah ha kaba iadei bad ki aiñ ki kanun, ka jingbym bit bym biang ha ka rukom thaw ia ka aiñ bad ka jingpynkheiñ ia ka riti synshar ka ri kaba la don hapoh jong katei ka Bill bad ban nym ai jingmynjur ia ka Khasi Hills Autonomous District (Trading by Non-Tribals) (Amendment) Bill, 2026.