Kut ka jingaipor ia ka sorkar, teh lama iong ka MEMRIWU ha ki 108

Ka Meghalaya EMRI Workers’ Union (MEMRIWU) hynne ka sngi ka la sdang ia ka jingiakhih kaba jai jai jong ki na ka daw ba ka por ba ki la buh ia ka sorkar ka la kut ka 29 tarik u Jylliew halor ka ki jingdawa ka seng.“Ngi kwah ban pyntip sha phi ki paidbah katkum ki jingpyllait khubor ba ngi la pynmih ha ka 3 tarik bad 11 tarik u Jylliew (June), ngi la thmu ban wad jingshai na ka Sorkar halor ka  Regularisation ia kane ka kam bad ban kyntu ia ka sorkar baroh ki mat jingdawa bad ki jingeh ba dang sahteng ba ka sorkar kan pynbeit hapoh ka Ophis,” ong u Roypar Kharraswai, President, MEMRIWU.U la bynrap, “Ngi la kyntu ruh ia ka Sorkar ban khot ia ngi sha ka jingiakren pynban haduh mynta ka sngi, ym pat don ba khot ne ai khubor eiei ia ka Union sha ka miej jing iakren.”

“Namar kata ngi kwah ban pyntip paidbah ba ka por ba ngi la buh ia ka sorkar lane ka timeline kan long haduh ka 29 tarik u Jylliew (June) katkum ka khubor ba ngi la pyllait sha ki lad pathai khubor kham mynshuwa bad mynta la pynlong ka jingiakhih ba jai-jai jong ngi kan iaid shakhmat naduh mynta ka sngi ka 30 tarik u Jylliew .” Halor ka bhah kaba nyngkong jong ka jingiakhih jong ngi, ngi teh/pyndait bad pyni da ki lama iong ha baroh ki kali 108 ambulance ha baroh kawei ka Jylla khnang ba u paidbah un sngewthuh bad tip ia ka daw bad kin ym klumar ne lyngngoh ynda u la iohi ia kine ki lama iong. Kane ka long ka rukom pynpaw jong ngi ia ka jingsngewkhia bad ka jingsngewlynga bad jing sngew sieh halor ka jingsngap bad ka jingbymsuidn̈iew ka Sorkar halor ki jingdawa ba shisha jong ngi.

Ngi kwah  ruh ban pyntip ba lada ka Sorkar ka iai kyntait ban sngap ia ki jing eh jingud jong ngi bad lada kam sngap, ngim banse ban shim ka rai ban sdang da kiwei pat ki bhah iakhih kiba kham tyngeh bad kane kan ktah ia ka service ha Jylla Meghalaya baroh kawei,” ong ka kyrwoh na u bah Roypar Kharraswai, President, MEMRIWU.