T.1,100 klur ai ka sorkar pdeng ban pyntrei ia ka skhim VB-G RAM G ha Jylla

U Myntri Rangbah ka Jylla u Conrad K Sangma hynne ka sngi ula ong ka Sorkar Pdeng ka la bhah T.1,100 klur ia ka Jylla ban pyntreikam ia ka Viksit Bharat-Guarantee Rozgar bad Ajeevika Mission (Gramin) Act, 2025 (VB-G RAM G) ka ban sdang treikam naduh lashai ka sngi.
Haba iakren ha ki nongthoh khubor hadien ka jingialang ka Kynhun Myntri ha State Guest House, Taraghar, Shillong, u Myntri Rangbah ula ong, ka Sorkar Pdeng ka la bhah T.1,100 klur ia ka jylla Meghalaya ban pyntreikam ia ka Viksit Bharat-Guarantee Rozgar bad Ajeevika Mission (Gramin) Act, 2025 hapoh 9 bnai.
Ula ong ba katei ka Act bathymmai kan bujli ia ka MGNREG Act bad kan treikam naduh ka 1 tarik Naitung bad kan iaid haduh ka 31 tarik Lber 2027 bad ka song T.1,100 klur ka dei ka jingai pisa ka Sorkar India ia ka Meghalaya na bynta ki khyndai bnai bad ula pyntip ia ka quarter banyngkong ne ki lai bnai kata naduh u Iaiong haduh Jylliew la pyntreikam ia ka skhim hapoh ki kyndon barim ka MGNREGS.
Ula bynrap ka jingpyntreikam ia kane ka aiñ thymmai kan sdang lashai ka sngi 1 tarik Naitung haduh ka 31 tarik Lber, 2027 ha jylla Meghalaya.
Ula ong ba ka T.1,100 klur kan dei ba iasam ha ka jingpynlut ba 90 da ka Sorkar Pdeng bad 10 na ka Sorkar Jylla bad kano kano ka jingpynlut ba palat ia katei ka la mang pisa ka Sorkar Jylla kan hab ban bei ka jinglut.
U Myntri Rangbah ula ong, mynshwa ia katei ka skhim la pyntreikam tang 100 sngi hynrei ka sorkar pdeng mynta ka la kyntiew sha ka 125 sngi bad ka la pyniar ruh ia ki kam ba lah ban pyntrei na ka 240-250 sha palat 320 tylli ha ki liang ki bapher ia kaba mynshwa kim don kum ki kam ba lah ban pyntrei lyngba katei ka skhim.