Ki kam pynroi kim dei ban kut tang ha ki project, ka sorkar kan iai trei ban kyntiew ia ki paidbah, ong u Conrad

Hadien ba ka Sorkar Jylla ka la pyntreikam ia ka One-Time Settlement (OTS) Scheme na bynta ki kali kamai, ka Joint Action Committee ka la pynkup burom ia u Myntri Rangbah ka Jylla u Conrad K Sangma ryngkat bad ia ar ngut ki Symbud Myntri Rangbah ka Jylla u Bah Prestone Tynsong bad bah Sniawbhalang Dhar ha ka jingialang hynne ka sngi ha Soso Tham Auditorium, Shillong. Haba kren ha ka jingialang u Myntri Rangbah ka jylla ula pynpaw ki riew sain pyrthei bun sien ki ju shah pynrem lada ym lah pynurlong ia ki jingdawa, hynrei ula iaroh ia ki rai ba ai jingmyntoi ha ka jingim ka long iar. “Haba don ki jingeh ki riew sain pyrthei la i kum ki nongshun, Hynrei haba lah ban pynbeit kham niar kan don ka jingithuh. Kane ka jingpyndon burom ka don jingmut bha ia ngi” ong u Conrad bad bynrap ka roi ka par kam kut tang ha ki project kam pynroi hynrei ka iaid ryngkat ban kyntiew ia ki nongshong shnong.

Ula ong ka roi ka par kam dei tang halor ki surokbah, ki jingtei lane stadium. Hynrei man ki rai ki dei ban wanrah jingmyntoi ia ki paidbah ha imlang sahlang bad ka synshar khadar. U Conrad ula ong, ba ka Sorkar ka la rai ban mab noh kumba T.850 klur sha ka T.1000 klur, ban buh hakhmat ia ka bha ka miat ki hajar tylli ki longiing ha jylla. “Ka rai kam dei kaba suk. Kane ka pisa lah ban pyndonkam sha kiwei pat ki kam. Hynrei ngi sngewthuh kumba 16,000 ngut ki nongniah trok bad kiba haiing kumba 2 lak ngut kin shah ktah. Kumta ngi la rai ban mab kumba T.850 klur” ula bynrap. Halor ka jingkynthoh pyrshah ka Sorkar ba ka pynleit jingmut tang ia ki project ba heh, u Conrad ula ong, “Hooid, ngi la kynshew ki jingtei ba heh bad kut jingmut ki rai ba hakhmat na bynta u paidbah, la ka long ka jingpynbeit ia ki jingeh ba la slem ki nonghikai, ka jingkyrshan ia ki nongrep lane ban pynkup bor ia ki nong sengkam sengjam”. U la ong, ka donkam ia ki jingtei ba heh bad ki jingiarap ban wanrah ki jingkylla ia ki paidbah nongshong shnong.

U la bynrap ki project ba heh ki phah ka khubor ba ka Meghalaya ka long la khreh, hynrei ka jingjop ka shong kumno ki sienjam ki kyntiew ia ka jingim ba man ka sngi ia ki paidbah”.U la iaroh ia u Symbud Myntri Rangbah Bah Prestone Tynsong ban jop ia ki jingeh ki nongniah kali kamai bad ban wanrah ia kane ka jingtyrwa. U Conrad ula kyntu ia ki kynhun ba don bynta ban iatreilang ban pynthikna ia ka jinglah pyndonkam ia ka pisa bad kiar na ki jingpynsah teng ki jingsiew bad kular ka Sorkar kan iai bteng ban pynkhlain ka rukom treikam.