Hato ka shnong Domiasiat bad kiwei ki shnong ba marjan hapoh ka thain South West Khasi Hills ki shah kyntait ki skhim kam pynroi naka Sorkar, dei namar ba ki pyrshah ban tih Uranium.
Haba leit shaka shnong Domiasiat la sakhi ba wat kiwei ki shnong ba marjan kim don wat iaka surok kaba dei u budlum jong ka roi ka par.
Lah ban kdew ka shnong Domiasiat kaba don tang 11 tylli ki longiing kadei ka shnong kaba ialam khmat ban pyrshah tih Uranium kynthup ka jingkyntait iaka song pisa daki phew klur tyngka.
Ka shnong Domiasiat ka jngai tang kumba 8 km naka shnong Wahkaji kaba dei ka shnong kaba la kiew bha haka jingdon ki kam pynroi namar wat ka surok ruh kadei kaba la bha.
Ka surok na Wahkaji shaduh Domiasiat bad Mawthabah kaba don kumba 8 km ka long kaba sniew shaba palat bad ka iathuh ba ia kane ka surok na Wahkaji shaduh Domiasiat bad Mawthabah la shna nyngkong daka UCIL haba thmu ban tih Uranium.
Ki nong shong shnong jong ka shnong Domiasiat bad ki shnong ba marjan ki im bad kamai
jakpoh daka ba rep Sohmarit, synsar, bad jait soh bapher bapher nalor ka kam ri jingri kum Masi, Biang bad Syiar.
Naka liang u Bah ND Syiem uba dei ruh u Pyrsa kurim jong i Meiieid Spility Lyngdoh Langrin ula ong ba la bun tylli ki snem ka Sorkar kala shu sngap mynthi haba iadei iaka roi ka par ha kane ka thain. “Imat kadei namar ka jingpyrshah jong ngi ia kata ka project ban tih Uranium” ula ong.
“Hoid haduh mynta ngi la ioh ka Bording bad ka skul Government LP Skul hynrei ngi dang donkam shuh kiwei ki jingdonkam ha kane ka jaka jong ngi ym mut tang iaka shnong Domiasiat hynrei naduh Umdohlun, Wahkaji, Phlangdiloin, Phlangmawprat ter ter” la ong u Bah Syiem.
U Bah Syiem ula ong ba ka thain ka donkam shibun ki surok kata na Wahkaji shasha Nongmalang, Mawthabah, Domiasiat bad kiwei kiwei, na Wahkaji sha Phlangdiloin sha Langpar bad pyniasoh sha Ranikor kaba dei ka Headquarter jong ka Ranikor Sub-division.
“Lait noh ka thain Wahkaji, ki surok sha kine ki shnong ki long kum ki surok iaid masi, iaid kulai” ula ong.
Ula ong ba watla ka shnong Domiasiat ka don um hynrei ka rukom sam um kadei lyngba ki Pipe jri bad tang shu wan u slap ba heh, ka rukom sam um kala shah pynthut noh. “Ngi kwah baka Sorkar kan maramot khnang baka long ka jingmyntoi naka bynta ki paidbah”.
Ula iathuh baka shnong Domiasiat kam don jaka sumar ne dispensary bad lada ki nong shong shnong ki pang shitom ki hap ban leit sha Wahkaji kaba jingai kumba 8 km.
“Ha kane ka thain ngi don tang kawei ka PHC ha Wahkaji kaba don tang 1 Doctor, ngi kwah baka Sorkar kan nang wanrah kham bun ki Doctor bad ban pynbun shuh shuh ki jaka thiah ki nongpang khnang ba ki paidbah kim da donkam shuh ban leit sha Shillong, Nongstoin lane sha Mawkyrwat” ula ong.
