Tur ki nongdie madan hakhmat ophis SMB, dawa thaw noh daka TVC ba pura

Ki nongshong die madan kiba don hapoh ka shatri jong ka Meghalaya & Greater Shillong Progressive Hawkers and Street Vendors Association (MGSPHSVA) hynne ka step ki la tur paidbah hakhmat ka ophis Shillong Municipal Boards (SMB).

Kane ka jingleit tur jong ki kadei ban dawa naka Ophis SMB ban thaw noh iaka Town Vending Committee (TVC) ka ba pura daka ba pynlong iaka ilekshon khnang ban iaid beit iaid ryntih ki kam haba iadei bad ka jingthmu ban pynkynriah ia kiba shong die madan naki thain Motphran, GS Road, Jail Road bad Khyndai Lad.

Haba kren shaki lad pathai khubor u Assistant General Secretary ka MGSPHSVA u Bah Shane Thabah u badei ruh u dkhot ka PTVC ula ong ba baroh ki tip ba la thaw iaka Provisional Town Vending Committee bad katkum ka ain ka PVTC ka treikam bad ka iap noh tang hadien shi snem naduh bala thaw iaka.

U Bah Shane ula ong ba kum uwei u dkhot ka PVTC u ju iohi ba ka Committee mynta kum ju shim kyllum lem iaka rai jong baroh hynrei la rai tang uwei u briew uba heh duh jong ka PVTC bad kane ka long beain katkum ka ain.

Ula kynnoh ba iaka PTVC la shu thaw khlem da don kano kano ka ilekshon bad dei namar kane ka PVTC ka treikam bad ka shim rai katba mon khlem da pyrkhat iaka hok jong ki nongdie madan.

“Namar kane ngi dawa naka Ophis SMB ban peit bniah bad ban thaw noh ia ka TVC ba pura daka ba pynlong ilekshon bad ban pyntreikam ruh kat kum ki kyndon jong ka ain haba pynkynriah iaki nongdie madan” la ong u Bah Shane.

U Bah Shane ula batai ba haka por iakren iaka mat pynkynriah iaki nongdie madan na Laitumkhrah, ka PVTC kala iakren bad kala leit jurip bad ki bor shnong iaki jaka bala ithuh ban ai shong iaki nongdie madan. “Watla ka jaka kam pat biang hynrei ngi ong to namar ngim dei ki briew kiba ia mih ban pynkulmar shnong hynrei ngi ia mih ba ngin iatrei kam lem bad ki briew jong ka Sorkar, bad ka ain” ula ong.

“Watla ngim pat hun iaki jaka hynrei ngi la ong to ngin ia pyrshang hynrei hadien katto katne sngi, ia kato ka jaka ruh kila shu rai hi maki bad kila pynbna (Denotify) ba katei ka jaka kam dei shuh ka jaka shong die jingdie madan” ula ong.

Halor ka jaka shong die madan ha MTC, u nongialam ka MGSPHSVA ula iathuh ba haka Committee la iakren ban nym pyniakhleh jaktung iaki ba die jingbam, jain ban kiwei ki mar pyut haka juh ka jaka.

“Haka por ba ngi iakren ki ong ba kin kynriah sha SMB Parking Lot, ngi la iakren ban pynkynriah noh iaki ba die bam hynrei haka por ba ai COV, wat iaki ba die jain ruh khlem da iakren haka Committee, la shu rai beit nangne na Municipal Office ban pynshong lang hajuh bad kiba die jingbam, jhur bad kiwei kiwei khamtam kiba mar pyut” ula ong.

“Kane ka pyni ba kim burom wat iaka Committee kaba la don, te mynta hangne ngi don hangne ban dawa ba dei ban pyntreikam noh iaka Town Vending Committee ba pura bad ban leh daka election khnang ba ka kam ka jam haba iadei bad ki nongdie madan kan nym don ka jingiashah liang bad kan iaid beit” ula ong.

Haba iadei bad ka jingkynnoh ba ka Sorkar ka thmu ban pynkynriah iaki ba die jingdie naki thain Iewduh, Iew Mawlong, Motphran, u nongialam ka MGSPHSVA ula ong ba ka ain ka don ba ym shah ban pynduh iaki Iew kiba la don naduh ki por mynshwa.

“Ka Iewduh, ka Iew Mawlong, Motphran ter ter kadei ka Iew kaba la don lypa la bun bun snem naduh hyndai hynthai iaka ba la tip kum ka Heritage Market ne Natural Market bad ka ain ka batai shai ba phim lah pynduh ia kum kita ki Iew” ula ong.