U Himanta u shah khot sngewbha, ym don jingïadei bad ka jing ïakajia khappud

U Myntri Sorkar Bah Sanbor Shullai uba dei ruh u nongialam ka Meghalaya BJP ula pynrem jur ia ka Voice of the People Party (VPP) namar ka jingpyrshah ia ka jingwan u Myntri Rangbah ka Assam Himanta Biswa Sarma sah ka lehniam Behdeinkhlam bad kynthoh ba kane ka jingleh kane ka party ka da “Ijah burom shisha” bad ka bym I donkam satia ban leh.

Lah ban kdew ba u Himanta ula wan sha kane ka jinglehniam ha Jowai kum u nongshah khot sngewbha ha ka Seinraij, Jowai ba un long u kongsan.

Haba kren shaki lad pathai khubor u Bah Sanbor ula ong “Hooid, ngi sngew jah burom ba ka party Prah (VPP) kala pyrshah ia ka jingwan u Myntri Rangbah ka Assam Himanta Biswa Sarma kum u kongsan ban sakhi ia kane ka lehniam bad tamasa kaba heh duh jong ka Jaidbynriew Pnar. Nga ruh nga la iadonlang bad u”.

U Bah Sanbor ula ong ba ka jingpyniasnoh ia kane ka jingwan jong u Himanta sha ka Lehniam bad ki kam iakajia pud ka dei kaba bakla shibun.

“Nga sngew samrkhie ba ki kynnoh ba u Himanta Biswa Sarma u dei ban pynbeit ia ka kam kajia pud ka bym don jingia snoh ka jingwan jong u bad ka kam kajia pud” ula ong haba bynrap ba watla ka kynhun ka don ia ka hok ban pynpaw ia ka jingsngewkhia halor ka kam khappud, hynrei ban wan iakhih ha ki jinglehniam nala tynrai ka dei ka bym iahap satia.

“Mano manor uh, ki riew shimet, Sengbhalang lane seng sain pyrthei ki don ia ka hok ban kren ia kano kano ka ishu…hynrei kim dei ban pyrshah ia ka jingwan jong u sha ka lehniam kum u kongsan…kam don jingiadei satia bad ka kam khappud” ula ong.

“Halor ka kam khappud, kila don ki Committee kiba la thaw da ka Sorkar…Lada ki don kano kano ka jingai jingmut lane kano kano ka jingpyrshah, da ka jingthoh, ki dei ban leit sha ka Sorkar lane sha kine ki Committee” ula bynrap.

“Ngi sngew sam rkhie ba ka seng sain pyrthei kum ka Prah kala kren ia kine kiei kiei, ka bym lah satia ban pdiang da ki paidbah jong ka Jylla” ong u bah Shullai.