Lada ka sorkar ka pyrshah tih Uranium ha Meghalaya

Ka Khasi Students Union (KSU) ka la ong ba lada ka sorkar ka don shisha ia ka jingthmu ban kan ym ailad ban tih ia u Uranium ha ka jylla, ka dei ban weng noh ia ka ophis Atomic Minerals Directorate kaba don ha Nongmensong bad ka dei ban pas da ka Resolution ha Iing Dorbar ban pyni sha ka sorkar India ba ka jylla kam shah ban tih ia u Uranium.

U General Secretary ka KSU u samla Reuben Naijar haba kren sha ki lad pathai khubor, ula ong ba watla ka sorkar jylla ka la kren shai ba kan ym don ka jingtih ia u Uranium ha ka jylla. Hynrei kaba sngewlyngoh ka long ba ka jingkren jong u Myntri ka sorkar pdeng u Jitendra Singh ba ka sorkar ka dang pyrkhat bad kane ka pyni ba ka dang don ia ka jingthmu.

“Ka jingkren jong u Myntri ka sorkar pdeng ba ka sorkar ka dang pyrkhat ia kane, lehse kadei namar ba ka sorkar jylla kam pat pyni ia ki dak ki shin bad ka rai jong ka,” ula ong.

U samla Naijar ula kam ba ka seng ka lap ruh ba ka don ka jingthied jaka jong ki briew ka sorkar ha ki thain Domiasiat bad ha kiwei ki jaka ba don u Uranium.

Nalor kine, ula kam ruh ba ki don ki MLA ki barim na ki konstiwensi bapher bapher ban thied jaka sha katei ka thain. “ Haba ngi pyrshang ban wad bniah ia ka daw ba pyllong ia ki ban thied jaka sha kitei ki thain, ngim lah ban sngewthuh namar ha kitei ki thain ym don ki jaka jngohkai pyrthei, ka rep ka riang ruh ka la iap. Kane ka pyni ba ka dang kaei kaei ka jingialeh ban tih ia u uranium,” ula ong.

“ Lada ka sorkar ka thmu shisha ban ym shah ban tih ia u Uranium kadei ban pyni ia ki dak ki shin da kaba pas ia ka Resolution ha Iing Dorbar ban pyni shai sha ka sorkar India ba ha jylla Meghalaya ym ioh ban tih ia u Uranium,” ula ong.

U General Secretary ka seng ula ong ba katba ka dang don ka ophis AMD ha Nongmensong ka mat Uranium ha ka jylla kan ym pat jah. Ula bynrap, “ Katba ka dang don ka ophis AMD ha Nongmensong, ka ishu Uranium ha ka jylla kan ym pat jah. Lada kam kwah ban ailad ban don ka jingtih Uranium kadei ban weng noh ia katei ka ophis namar ba kam ai jingshakri eiei.”

Ha kajuh ka por ula ong ba ki lai tylli ki Autonomous District Council (ADC) ruh kidei ban pas ia ka Resolution ha Iing dorbar namar ba u Uranium um don tang ha Khasi Hills hynrei u don ha Jaintia bad Garo Hills.