Thombor ki Garo ia ka jaka rep ka Kong Phikir Khongwir ha Jalithem

Kawei ka longkmie kaba dei na ka thain Ri Bhoi ka la pynpaw ia ka jingsngewkhia halor ka jingwan thombor ki paid Garo ia ka jaka rep jong ka kaba don ha Jalithem, Ri Bhoi District kaba ju khot Naladhar.

Haba kren sha ki lad pathai khubor kane ka longkmie ka kong Phikir Khongwir, ka la ong ba kane ka jaka kaba heh kumba 5 akar la thied ha u snem 2007 na ka kong Iormai Syiem kaba dei peit u Rev. H. Even Syiem bad hadien kane ka la sdang ban buh ia 20 ngut ki nongtrei ban rep ban riang.

Hynrei kaba sngewsih ka long ba naduh ba thied ia ka jaka haduh mynta ki sngi, kam pat ioh ban leit rep namar ki Garo ki wan thombor ia ki nongtrei jong ka, la kynnoh ka kong Phikir.

Ka la ong haba iadei bad kane ka jaka ka biang lut ia ki kot ki sla bad ka la iaid ruh da ka mukotduma ha kaba ka la jop ia ka mukotduma bad ka la ioh bor ba kan hiar ban trei ha katei ka jaka.

“ Hadien ba nga la jop ia ka Mukotduma, nga la hiar bad ialam biang ia ki nongtrei, hynrei ki Garo ki la wan da ka shnong bad don uwei napdeng jong ki, uba la kam ba udei u Rangbah shnong, ula wan ban thombor bad ngim iohlad ban trei, ki la wan shoh wan bom bad tied ia ki nongtrei jong nga,” la kam kane ka longkmie.

Haba iadei bad kane, na ka liang jong kane ka longkmie ka la ujor da ka ejahar ha Patarkhmah Police Outpost bad ka la kyntu ia ka sorkar ba kan shimkhia ia kane ka jingeh jong ka.