Palat 53 hajar ki nongthep vote kim don iing, kyntait 323 ngut ban pynrung kyrteng SIR

Ki don 323 ngut ki nongthep vote ha Meghalaya ba kyntait ban pdiang ia ki Enumeration Form (EF) ha ka jingpynrung kyrteng Special Intensive Revision (SIR) 2026.

Ia kane la pyntip da u Chief Electoral Officer ka Meghalaya u Dr BDR Tiwari ha kaba ula iathuh ba 53,908 ngut ki nongthep vote, ba kot 2.29% na ka jingdon ki nongthep vote ha Jylla, ki dei ba la ithuh kum ki Absentee (ki bym don ha Iing) ba la kynriah jaka sah, kiba iap bad ki dulicate haduh mynta.

Haba kren sha ki lad pathai khubor u CEO ula ong, “Na kine, 5,795 la ithuh kum ki bym don ha Iing, 13,379 ba la kynriah jaka sah, 32,382 ba la iap, 2,029 ki duplicate, katba 323 ngut ki la kyntait ban pdiang ia ki Enumeration Form”.

U CEO ula ong ba ia kine ki case baroh, kynthup kito kiba kyntait ia ki form, yn sa leh eiei kat kum ka Registration of Electors Rules, 1960, hadien ba dei pynshisha bad ban ai lad ia ki, ha shuwa ban shim ia ka rai halor ka electoral roll.

U CEO u iathuh ba ka SIR ka la kynjoh ia 98.17% ka jingsam ia ki EF kat haduh ka 21 tarik Naitung, 2026, ha kaba haduh 23,06,585 tylli ki form lah dep ban sam sha ki 23,49,645 ngut ki nongthep vote.

Ka jingpynrung ha ka kor digital ka la kot 62.15% kaba long haduh 14,07,446 tylli ki form.
Ka West Jaintia Hills, South West Khasi Hills bad South West Garo Hills ki la kynjoh haduh 100% ka jingsam ia ki form katba ka West Khasi Hills ka la lam khmat ha ka jingpynrung kor digital kaba kot 79.86%.

U Dr Tiwari ula pynkynmaw ia ki nongthep vote ki bym shym la aiti ia ki enumeration form ba la dep pyndap hapoh ka por ba la buh, yn ym kynthup ia ki hapoh ka Draft Electoral Roll ka ban sa pynmih ha ka 5 tarik Nailar, 2026.

Ia ki form lah ban ai ti ha ki BLO lane online lyngba ka ECINET App and https://voters.eci.gov.in.

U CEO ula iakynduh ruh ia ki nongmihkhmat ki National bad State Political Party ha ka 21 tarik Naitung bad ki ai khublei ia u halor ka jingthung ia ki 892 ngut ki Booth Level Agents (BLA) ban iarap lem ha kane ka jingleh SIR.