Pynjari kyndon BNSS u DC ban mana shet jingshet harud surok bad jaka shangkai

Halor ka sienjam ban khang lad ia ka jingbret jaboh bad ban kyntiew ia ka kam jngohkai ba don ka jingkitkhlieh, ki bor district ka East Khasi Hills ki la pynmih hukum ban mana shet jingshet harud surok bad ban bret jaboh ha ki jaka jngohkai pyrthei, ki jaka peit kai bad ki jaka paidbah ha baroh kawei ka district. U District Magistrate ka East Khasi Hills u Abhilash Baranwal ula pynmih ïa ka hukum katkum ka kyndon 163 jong ka Bharatiya Nagarik Suraksha Sanhite (BNSS), 2023, kaba treikam mardor namar ka jingsngewkhia halor ka jingpynjot ïa ka mariang ha shilynter ki lynti jngohkai pyrthei ba pawnam jong ka Shillong–Mawkdok–Sohra bad kiwei ki jaka jngohkai pyrthei.

U District Magistrate ula ong ba ka shet jingshet harud surok da kaba pyndonkam da ki dieng thang, rnga, ki tyndong LPG ha ryngkat bad ka jingbret pathar ïa ki plastik, ki jaboh jabaiñ, ki bilor, ki tin bad kiwei kiwei ki jaboh ka la ktah ïa ka jingkhuid jingsuba, ka pynthut ia ka leit ka wan bad ka jingma na ka jingkem ding ki khlaw nalor ka pynjaboh bad pynsiew ïa ka dur ia ka Meghalaya.Ki bor District ka la khang ruh ban bret jaboh ha ki khlaw, ki jaka um, ki nala um bad ki jaka rud surok.Ki heh sorkar ki la maham ba ki nongpynkheiñ aiñ kin ngat ha ka jingshah pynngat ha ka kyndon 223 jong ka Bharatiya Nyaya Sanhita (BNS), 2023 bad kiwei kiwei ki aiñ kiba treikam.

Ia ka hukum la pynmih namar ka jingkyrkieh ka jinglong jingman, ka la treikam noh mardor bad kan dang treikam haduh ban da pynmih hukum da kumwei pat. Ki bor District ka la kyrpad ïa ki nongjngoh kai pyrthei, ki nongshong shnong bad ki nongshim bynta ban ïatreilang ban pynlong ïa ka East Khasi Hills kaba khuid bad ban pynneh pynsah ïa ka nam ka Meghalaya kum ka jaka jngohkai kaba pawnam tam.