Ka Byrnihat kam lait na ka jingjaboh namar ka don marjan bad Assam

U Myntri Sorkar Jylla bad u MLA Jirang konstitwensi u Bah Sosthenes Sohtun ula kyntait ba ka Byrnihat ka dei ka shnong ba jaboh tam da kaba ong katkum ka kaiphod thymmai ka Byrnihat kam dei shuh ka jaka ba jaboh tam ka lyer hapoh ka pyrthei.
Haba kren shaki lad pathai khubor u Bah Sosthenes ula ong ba ka thain Byrnihat kaba don marjan bad ka Assam kam lait na ka jingdon ka lyer ba jaboh hynrei kam dei pat ka jaka ba jaboh tam ka lyer hapoh ka pyrthei.
“Kumba ka long mynta kam dei kumta, hynrei haba ia dei bad ka jingjaboh ka lyer te ngim lah ban shu pynksan ba ka khuid namar phi lah tip ba ka Byrnihat ka dei ka jaka ba don bun tylli ki karkhana kumta ka jingpynjakhlia ne ka jingbym bud kyndon ki karkhana katkum ka jingbthah ka Meghalaya State Pollution Board (MSPCB), kumta kan don beit ka jingjakhlia hynrei ban ong ka dei kaba jakhlia tam ha pyrthei kam dei kumta” la ong u Bah Sosthenes.
U Bah Sosthenes ula iathuh ba naka liang ka Sorkar naka por shaka ka la don ki jingpynsngew ba ki karkhana kiba don ha Byrnihat kin bud beit katkum ki kyndon ka MSPCB khnang baka thain kan long kaba khuid.
Ula pyntip ba dangshen ka Sorkar lyngba ka MSPCB kala sam iaki kor (Device) kiba lah ban tan iaki tdem kiba mih naki kali ne karkhana hynrei ula ban jur ba ki karkhana kidei ban iai bud ryntih iaki kyndon ka MSPCB khnang ban pynthikna ba ka Byrnihat kan nym shah pynjakhlia.
“Na ka liang ka Company ka la pyrshang ban buh ia ki Machine bad ki la ioh ruh ia ka Data Report na ka liang ki scientist bad engineer ki la batai ba ka machine ka pyni ba ka lah ban tan 40-50 percent ia ki tdem jaboh” ula ong.
“Hynrei dei ban sngewthuh ruh ba wat la ngin pyrshang ia kane ka Project hynrei ki karkhana kiba don hapoh Byrnihat kim dei ban iaid lait ia ki kyndon ba la buh da ka MSPCB bad kino kino kiba iaid lait ne pynkhien ia ki kyndon kin shah pyngat katkum ki kyndon ain” ula bynrap.