Hukum ka Meghalaya HC ïa ka KHADC ban thung biang ïa u Ainam Manik kum u Syiem ba pura ka Hima Mylliem

Ka iingbishar Meghalaya High Court hynne ka sngi kala hukum ia ka Executive Committee ka Khasi Hills Autonomous District Council (KHADC) ba synshar daka Voice of the People Party (VPP) ba kan thung biang ia u Pa’iem Ainam Manik Syiem kum u Syiem ba pura jong ka Hima Mylliem.

Ia kane ka hukum la pynmih da ka Iingkashari u Justice W Diengdoh haba bishar ia ka mukotduma bala mudui da u Pa’iem Ainam Manik Syiem pyrshah ia ka hukum sospon jong ka KHADC.

Ka Iingkashari kala kdat ruh sharud ia ka hukum jong ka KHADC ba pynmih ha ka 22 tarik Jymmang, kaba thung ia u Acting Syiem Alban Fedrick Syiem ba un pyniaid shipor ia ki kam ka Hima.

Ka Iingkashari kala pynpaw ba ka jingleh jong ka KHADC haba iadei bad ka jingsospon ia u Syiem ka Hima Mylliem, ka dei kaba khlem iaid kat kum ki kyndon ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong Syiemship) Act, 2007 bad kumta, ia ka hukum sospon la kdat noh sharud bad khein iap.

Namar kata, la bthah ia ka KHADC ba kan thung biang ia u Pa’iem Ainam Manik Syiem kum u Syiem ka Hima Mylliem bad la khein iap noh ia ka hukum thung Acting Syiem.

Kumjuh ruh, haba iadei bad u Deputy Syiem, ka Iingkashari kala ong ba namar la rai ba ka jingsospon ia u Syiem ka dei ka ba khlem iaid kat kum ka ain, ka mukotduma u Syiem Khynnah Bah Mansan Manik Syiem ruh kam donkam shuh ban bishar bad la thungbiang ia u kum u Acting Syiem.

Kat kum ka jingpynbna ba pynmih da u Secretary ka KHADC, ia u Pa’iem Ainam Manik Syiem la sospon kum u Syiem ka Hima Mylliem, kat kum ka bor bala pynkup da ka kyndon 7 jong ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong Syiemship) Act, 2007.