Kynmaw ka tnad Lariti ia ki lanot bad ba lait im na ka jingphiah ka Ri India ha u 1947

Ka Lok Bhavan Shillong ryngkat ka jingiatreilang bad ka Tnad Arts and Culture ka Sorkar Jylla hynne ka sngi ka la pynlong ia “Ka sngi kynmaw burom ia ki jingma jong ka jingphiah” (Partition Horrors Remembrance Day) ha Lok Bhavan, Shillong ia ki lanot bad ba lait im na ka jingphiah ka ri India ha u snem 1947.

La sdang ia kane ka prokram da ka jingpynher ia ka lama ka ri da u Lat ka Jylla u C.H. Vijayashankar ha ka jingdonlang ka Director ka Tnad Arts and Culture, ki heh ophisar sorkar na ki tnad bapher bapher, ki samla pule bad kiwei kiba la shah khot sngewbha.

Hadien ka jingpynher ia ka lama ka ri, ki nongiashim bynta ki la leit pat sha Durbar Hall jong ka Lok Bhavan, ha kaba la ioh ia ka prokram kaba ia dei bad ka kolshor na ki samla pule bad hadien kane la ioh ia ka jingkren halor ka dor jong ka jingim briew bad ka jingshah ktah kaba iaineh na ka jingphiah ne Partition.

Haba kren ha kane ka sngi u Dr. David Arnold Kharchandy u Assistant Professor ka Synod College ula ong, ba ka jingphiah ym dei ban shim kum ka jinglong jingman ha ka kam sain pyrthei kaba kdew ia ka jingkut jong ka jingsynshar ki phareng bad ka jingthaw ia ka ri India bad Pakistan.

Ula ong, da ki million ngut ki riew paitbah, ka jingphiah ka mut palat ban ia ka jingdro ia u ‘Radcliffe Line’ ha ka map. Ka la lam sha ka jingduh ia ki iing ki sem, jingphiah ia ki longiing, ka jingpynthud ia ki jaidbynriew bad ka jingsdang jong ka lynti ka bym shai kdar na ka bynta ki briew kiba la shah pynbor ban iehnoh shadien ia kiei kiei baroh.

Ula banjur ba ka jingkynmaw ia ka jingphiah ka long kaba kongsan namar ha ka histori kan hap ban iaid palat ia ki jingkhein bad ia u pud u sam jong ka kam sain pyrthei ban ithuh ia ka jingshemphang bad ia ka jingmad jong ki briew kiba la im lyngba katei ka lanot.

U Dr. Kharchandy ula maham ruh ban pynkylla ia katei ka jingshem jynjar ha ka por ba phiah hapdeng ki jaidbynriew. Ula ong ba ki briew na ki niam bapher bad jaidbynriew bapher kila mad ia ka jingshitom bad kane kala pynduna ia ka lanot jong ki briew jong ngi pyrshah ia ki briew ki jongki, kan khanglad ia ki pateng ban dang wan ban ioh ia ki jingtip ne ka jingpule ia ka lynnong kaba shisha jong ka histori.