Phah dorkhas ka HITO sha ka NHAI ban maramot ia ka surokbah na Jorabat-Umiam

Da ka jingsngewkhia halor ka jinglong jingman ka surok bah National Highway 06 ha Ri Bhoi District mynta ka sngi ki nongialam ka Hynñiewtrep Integrated Territorial Organization (HITO) Ri Bhoi District, ba la lamkhmat da u Samla Marius Mallai, General Secretary, u Samla Rahlang-Me-i Syntem, Transport Secretary lem bad ki dkhot ki la leit kynduh bad ban buh da ka jingthoh ha ka Office Treikam jong ka NHAI kaba don ha 20 Mer, Ri Bhoi District.Ka jingthmu jong kane ka jingïakynduh ka long ban pynsngew ïa ka jinglong jingman jong ka NH-6, naduh Jorabat haduh Umiam, khamtam halor ka jingsniew ka surok, ka jingmih bun ki thliew ki syar bad ka jingpynslem jong ka NHAI ban maramot bad pynbha ïa kiba bun ki bynta ba la sniew ha u surok bah kaba la buh jingeh ia ki paidbah nongleit nongwan. Ka HITO Ri Bhoi District ka pynpaw ïa ka jingsngewkhia kaba jur halor ka jinglong sniew ka surok, namar kane ka lah ban buh jingma ïa ki nongleit nongwan, ki nongñiah kali bad kiwei kiwei kiba pyndonkam man ka sngi ïa kane ka surok bah.

Khamtam, don bun ki jaka ha kaba la dep khlong ïa u surok hynrei ym pat lah ban siang rong thymmai, bad ki potholes ki dang don ha kiba bun ki bynta.La kdew ruh, ba kane ka pynlong ïa ki nongñiah kali ban mad jingeh bad ka lah ruh ban wanrah ïa ki jingjia aksident kiba lah ban poi sha ki jingjia kiba sngewsih.Na ka liang ki bor ka NHAI, ki la ai ia ka jingkular ban shimkhia mardor halor kane ka mat naduh lashai ka 14 tarik Nailar terter, kumta na ka liang ka HITO ka khmih lynti ba kane ka jingkular kan urlong shisha bad ym sah tang ha ka ktien, namar ka jingshngaiñ jong ki paidbah ka long kaba donkam tam.Ka seng ka la kyrpad ruh ïa ka NHAI ban buh ki warning signs, signals ne signboards ha ki jaka kiba don ki potholes, ki bynta kiba sniew bad ki jaka kiba dang don ha ka jingmaramot, khnang ba ki nongñiah kali kin tip lypa bad kin lah ban pynrit ïa ka speed jong ki. Na bynta ka jingshngain jong ki nongleit nongwan, ka HITO ka la buh ia ki mat ba kongsan hakhmat ka NHAI, kiba kynthup ban maramot mardor ïa baroh ki thliew ki syar kiba don ha ka NH-6, ban Pynbha ïa ki bynta kiba la dep khlong hynrei ym pat dep siang rong, ban buh warning signs/signboards ha ki jaka kiba don jingma.

Shuh shuh ruh, la dawa ban pynbiang ïa ki dak pynïathuh lypa ha ki jaka kiba dang don ha ka jingmaramot, ban Pynneh pynsah ïa ka jinglong bha jong u NH-6 khnang ba kan long kaba shngaiñ ïa ki nongleit nongwan, ban Pynkhlaiñ ïa ka jingpeit jingkhmih ïa u surok khnang ba ki jingeh kin ym nang kham sniew shwa ban shim ïa ki lad jingïada.Na ka liang ka seng kan buddien ïa kane ka kam bad kan khmih bniah ïa ka jingpyntreikam ïa ka jingkular, khnang ban pynthikna ba ki jingmaramot ki long kiba shisha bad kiba pynmyntoi ïa ki paidbah.“Ngim dei ban ap haduh ban jia ka jingjia kaba sngewsih shwa ba yn shimkhia ïa ka jinglong sniew jong u surok. Ka jingshngaiñ jong ki paidbah ka dei ban long ka jingkitkhlieh kaba hakhmat eh.” Pynpaw ka HITO Ri Bhoi District.