Sdang jot ka surok Nongstoin-Maweit,ap jingma ka jingkieng ha Risiang

Ka jingshna ia ka surok Nongstoin- Maweit kaba dang shu dep shen ka la wanrah ia ka jingkyrmen kaba khraw ia ki paidbah nongshong shnong ka thain Maweit bad ia ki shnong ba dei iaid katei ka surok, hynrei kumba long mynta ki paidbah ki la iduh jingkyrmen namar tang hadien katto katne ba la dep ban siang rong, katei ka surok ka la khoh bad sniew biang ha kiba bun ki bynta bad wat haba ka Company ba pyntrei ka pyrshang ban maramot biang la katto katne sien, hynrei imat namar ka jingbym biang ka rukom pyntrei naduh nyngkong, katei ka surok kam shym la shan bad ka la sdang pra biang mynta ha shilynter jong katei ka surok kaba la sdang ter ter naduh Nondein- Nongpyndeng bad haduh ka 23 Kilometer ba la dep pyntrei.
La sakhi ruh ba ka jingkieng ha ka Shnong Risiang kaba dei ka jingkieng ba kongsan bh jong ki paidbah katei ka thain̈, ka la sator bad jot rathai ha kaba ka la buh jingma ia ki kali ba iaid ba ieng namar ka la lei thliew bad pyut lut.
Halor kane ka bynta, ka HYC Maweit Circle, hapoh ka jingïalam jong u Samla Shemphang Tyrsa, President, bad u Samla Maximilando Umiong, General Secretary, ryngkat u Samla Lumlang Kharsyiemlieh, President HYC West Khasi Hills District, ka la leit ïakynduh ïa u Executive Engineer, PWD (Roads), Nongstoiñ, u Bah D. Ranee, ban kyrpad ban maramot noh mardor ïa ki bynta ba la sdang ban jot jong ka surok Nongstoiñ–Maweit kaba 23 km bad ban pynbha noh ia ka jingkieng hapoh ka shnong Risiang.
Na ka liang u EE PWD, u Bah D. Ranee, u la ong ba ka jingkieng ka la jot palat bad ym lah shuh ban repair, hynrei ka donkam ban tei thymmai. U la kular ruh ban shimkhia bad ïakren bad ki bor ba dei peit halor ka surok bad ka seng ka la ban jur ba kan iai buddien ia katei ka mat kat haduh ba ka sorkar lyngba ka PWD ban shimkhia ban pynbit pynbiang ia katei ka surok bad kumjuh ia katei ka jingkieng.