Ka Golf ka jingialehkai ki heh spahKi samla ki dei ban pynlut por haki jingialehkai phutbol bad kriket

Ka sorkar jylla ka la pynkhreh ban shna ia ka madan Golf ha Golflink kum ka madan ialehkai golf ka ban long kum sha phareng ne international course golf.
Haba kren halor kane, u Rangbah Shnong ka Golflink u bah Michael Hek ula ong, ba kane ka madan ha Golflink ka dei ka madan kumba la shna hi ka mariang hynrei na ka liang ka sorkar ka la pynkhreh ban pyllong kum ka International Golf Course khamtam hadien ka la pynrung ruh ia kane ka jingialehkai ha ka National Games.
U la ong ba ka jingpynrung ka sorkar ia kane ka jinglehkai ha ka National Games ka long kaba bha, hynrei shisien ba ka leh ka pyllut ia ka Golf Course ka dei ban pyntreikam da ka rukom ba biang.
U Bah Micheal ula ong ba haduh mynta kane ka Golf Course ka dei ba pyniaid shimet da ka Shillong Golf Club bad lada ka shimti hi ka sorkar ka lah ban pyllut kham bun ban long kum ka jaka jngohkai bad kum ka International Golf Course.
Hynrei ha kajuh ka por, u bah Micheal ula ong ba ka jingialehkai golf kam dei kaba ai jingmyntoi ia ki paidbah u kum u luk u lak namar ba ka dei ka jait jingialehkai tang kiba heh spah, kiba shu kwah ban lehkai sngewbha ym na ka bynta ban ioh kam ioh jam, kumba long ka jingialehkai kynjatbol, cricket bad kiwei ki jingialehkai.
“Ki khun ba duk ban lehkai Golf kam dei ba suk namar tang ka bai lehkai ban shu pyrshang kan lut T.1500-T.2000. Kane ka jinglehkai ka long beit thik na bynta ban sngewbha bad ban iakren kam khaii pateng,” ong u bah Micheal.
U la ong ba na kane ka jinglehkai Golf, ym pat ju don ki khynnah kiba ioh kam ioh jam kumba long kiwei ki jait jinglehkai. Ki khynnah samla ban pyllut por ia ka Golf, kam pat myntoi ia ki bad kan bha ba kin pyllut por ha kiwei ki jinglehkai kum ka Football, Criket namar ka don ia ka lawei.
U la ai jingmut ba lada ka sorkar kan shimti noh ia kane ka madan golf course da kaba iakren pynbeit bad ki trai jaka, kan ai jingmyntoi ia ki paidbah, ia ki samla ka shnong ha ka ioh kam ioh jam bad kan long ruh kum ka jaka jngohkai ba pawnam bha.