T.17.85 klur pyllait ka sorkar India ia ki Disaster Mitigation Project ha Jylla: Lahkmen

U Myntri ka Tnad Revenue and Disaster Management u Bah Lahkmen Rymbui, ula pyntip ha ka iing Dorbar ba ka Sorkar Pdeng ka la pyllait ia ka T.17.85 klur na bynta ar tylli ki Disaster Mitigation Project ha jylla Meghalaya.

Haba jubab ia ka ‘Cut Motion’ halor ka Disaster Mitigation Fund and Preparedness, u Bah Lahkmen Rymbui ula ong, ka sorkar ka la pan bor da ka jingbhah tyngka hadien ba katei ka pisa la pyllait da ka Sorkar Pdeng bad ula iathuh ia ka Supplementary Demand ba mynta ba ia dei bad ki projek ba kyrshan da ka NDMF kam dei ka jingkyrpad ban bhah tyngka thymmai. Kumta kine ki projek ki dei ba lah dep ban ai jingmynjur bad ka jingkyrshan ka Sorkar Pdeng ka dei ba la dep pyllait.

Ula iathuh ba ka ‘Mitigation’ ka iapher na ka jingai mardor ia ki jingiarap ‘Relief’ haba don kino kino ki jingwan lynshop ka bor mariang, hynrei ka Mitigation kadei ka jingshim ia ki sienjam ban pynduna ia ka jingshah ktah ne jingma na kino kino ki jingjia jong ki jingwan lynshop ha ki por kiban sa wan.

“Hapoh jong ka 16th Finance Commission, ka Meghalaya kan ioh T.97 Klur hapoh jongka State Disaster Mitigation Fund (SDMF) naduh u 2026-27 haduh 2030-31, ha kaba 90% na ka Sorkar Pdeng bad 10% na ka bhah jong ki Jylla kiba hap hapoh ki Himalayan States” la ong u Bah Lahkmen.

Na ka T.17.85 Klur kaba la pyllait da ka Department of Expenditure, T.12.27 Klur kadei na ka bynta ka Mitigation Scheme for Forest Fire Risk Management (MSFFRM) bad T.5.58 Klur na ka bynta ka Mitigation Project on Lightning Safety (MPLS).

Ia ka MSFFRM kaba la tyrwa da ka Tnad Forest yn pyntreikam ha West Khasi Hills, South-West Khasi Hills, Ri-Bhoi bad East Garo Hills bad ka jingthmu ka long ban pynkhlain ia ka jingiada ban lait pluh ki khlaw, ka jingai jingmaham kloi, ka jingkhmih bniah ia ka jingma, ka jingpynkhreh lypa bad ban pynduna ia ka jingshah ktah ka mariang bad ki shnong ki thaw kiba shaniah ha ki khlaw.

Ka jinglut jingsep jong ka projek baroh kawei ka long T.15.82 Klur kynthup ia ka bhah ka Jylla kaba T.1.23 Klur bad T.2.32 Klur na ka bynta ka Preparedness and Capacity Building hapoh jong ka SDRF. Ia ka MPLS project, yn pyntreikam da ka MSDMA, ka wan hadien ba la ithuh ia ka jingpom pyrthat ne Lightning kum ka State Disaster. Ka jinglut baroh ka long T.6.74 Klur bad kane ka projek kan ialeh ban pynbha ia ka jinglah ki shnong ban ioh pdiang ia ki jingmaham kiba biang por bad ban shim ia ki lad jingiada.

U Bah Lahkmen Rymbui ula iathuh ba ia ka Additional Supplementary Demands kaba T. 2.39 Klur na ka bhah ka Jylla, T.22 Klur ia ka SDMF Project kum ka jingshna ia ki kynroh, nala, ki Steshon ban batai lypa ia ki jingshlei um bad Flood-Plain Zoning Studies bad ia ka T.4.32 Klur ban pynkhreh lypa bad ka jingai jinghikai pyntbit kadei kaba la dep ai ia ka jingtyrwa.