Kyrmen u Myntri Rangbah ban ioh lum khajana kyiad T.1000 klur

U Myntri Rangbah ka Jylla u Conrad K Sangma hynne ka sngi, ula plie paitbah ia ka Ophis ba thymmai jong ka Tnad Excise ha Lower Lachumiere, Shillong bad ka Tnad Excise mynta hadien 50 snem tam kala iohj syndon ia la ka jong ka ophis kaba pura.

Ha kane ka jingplie ia kane ka ophis, la iadonlang u Myntri ka Tnad Excise u Brening A Sangma, u Chief Secretary Dr Shakil Ahammad bad ki Heh Ophisar lem bad ki nongtei ka Tnad Excise.

Haba kren ha ka jingialang, u Myntri Rangbah ula ong, ba ia kane ka jingplie kum ka sngi ban lehkmen ia ka Tnad bad ruh ka Sorkar Jylla.

“Ka ai ka jingsngewhun ia nga ban plie ia kane ka iing building, kaba dei ka jingdawa ba la slem jong ka Tnad” ong u Conrad bad ka bynrap ba ka Tnad Excise ka la synniang shikat dei eh ia ka pla tyngka ka Jylla bad bynrap ba kane ka building ba thymmai ka long shibynta jong ka sienjam ka Sorkar ban tei bha ia ki jingtei.

Haba kren halor ki jingpynroi ia ki jingtei bala leh ha kine ki phra snem bala leit, u Conrad ula kdew ia ka jingshna pynbha bad pyntrei ia ki Iingskul, ki Police Station bad Outpost, ki Ophis ki Block, Primary Health Centre (PHC), Community Health Centre (CHC) bad ki Sub-Centre.

Ula iathuh ba ka jinglum khajna ka tnad kala kiew bun shah bha na kumba T.180 klur ha ki phra snem mynshuwa sha ka palat T.500 klur mynta bad kila shim ia ka rai kaba kongsan ban pyniasnoh lang ia ka Excise bad ka VAT, kaba la khmih lynti ban nang pynkiew shuh shuh ia ka jinglum khajna.

U Conrad ula ong, ba ha u Nailar 2026, ka Kynhun Myntri ka la mynjur ban pynwanlang noh ia ka VAT halor ka kyiad sha ka Excise Duty da kaba pynkylla ia ka kyndon 44 bad Schedule V jong ka Meghalaya Value Added Tax Act bad la khmih lynti ba ka jingioh lum khajna shen kan sa tam ia ka T.1000 Klur.

Ia kane ka Ophis thymmai la tei ha ka jinglut jingsep kaba kot T.14.55 klur bad kan don ia ka Laboratory, Enforcement Wing, Integrated Excise Management System bad ka Ophis u Commissioner ha kajuh ka iing building.