Hadien bapdiang burom buh u VP ka India San tylli ki Mawnongrim

U Vice-President ka India, u C. P. Radhakrishnan, hynne ka sngi ula iashim bynta ha ka jingialang paidbah kaba la pynlong ban ai burom kyrpang ia u da ki paitbah bad da ka Sorkar Meghalaya kaba la long ha Soso Tham Auditorium, Shillong ha kaba ula buh mawnongrim ruh halor ki 5 tylli ki projek jongka jylla Meghalaya.

U Vice President ula pynpaw ia ka jingsngewnguh ia kane ka jingpdiang burom bad ula ong, ba un iai ieng ryngkat bad ki paitbah ka Meghalaya ha ka jingiaid lynti ka Jylla ha kaba iadei bad ka roi ka par.

U Vice-President ula pynpaw ruh halor ka jingriewspah ka Meghalaya ia ka kolshor kaba naduh hyndai hynthai, ka jingdon ia ki jaka kiba itynnad, ki jaka synshar tynrai kynthup ia ka jingshim jait na ka kmie bad pynpaw ruh ba ki kam synshar khaddar ha ki shnong ki thaw kidei kiba pyni ia ka jingiar bad ia ka kolshor ha ka synshar khaddar tynrai.

Ula pynkynmaw ruh ia la u paralok ha Lok Sabha u (L) P. A. Sangma, ula ong ba udei u nongialam uba radbah bad u nongkren uba tbit bha uba la noh synniang shi katdei ha ki kam synshar khaddar bad ha ka iingdorbar thawaiñ.

U CP Radhakrishnan ula ong, ba ka ‘Secularism’ ne ka jingmane kaba laitluid ia kano kano ka niam ha ri India ka shong eh ha ka jingburom mar kylliang ia ka jingngeit niam bad ka rukom mane bad ula banjur ia ki paitbah ba kidei ban ia imlang da kaba burom iwei ia iwei bad ka banjur ba ka roi ka par kadei ban long kaba salonsar bad ym dei ban ieh shadien iano iano ruh.

Ula pynpaw ruh ia ka jingkongsan ha kaba iadei bad ki lad pyniasoh bad kila don ki jingpyrshang ban pyniasoh ia ki shnong kiba don sha jngai tam bad ki jaka sor bad nongbah bad ka pynpaw ba palat 46,000 Km ki surok ha nongkyndong lah dep ban tei ha North-East hapoh jongka PMGSY ha ki 10 snem kiba lah dep ha ka jinglut kaba kot T.47,000 Klur.

Ula iaroh ruh ia ka jingkylla ka Meghalaya lyngba ka jingiasoi ia ka MoU hapoh jong ka Jal Jeevan Mission 2.0.

U Vice President ula buh ia u mawnongrim na ka bynta 5 tylli ki projek kiba kot T.1,010.95 Klur. Kine ki kynthup ia ka New Shillong Water Supply Scheme Phase II, Part A (₹850.58 Klur) hapoh jongka Urban Challenge Fund, Artylli ki surok hapoh ka NESIDS, ka 30-Bedded AYUSH Facility ha Shillong Civil Hospital bad ka 132/33 KV Substation ha Mawkhanu hapoh jongka PM-DevINE.

Ula plie ruh ia ka Maternity and Children’s Hospital ha Nongstoin, kaba la tei pyndep ha ka jinglut kaba kot T.31.05 Klur hapoh jongka National Health Mission. Ula ong ba kine ki projek baroh ki shongdor kumba T.1,042 Klur, kin pynkhlain ia ka jingsam umbam umdih, ki lad pyniasoh, ka jingai jingsumar kaba bha bad ka jingpynbiang ia ka bording elektrik ha Meghalaya.

U Vice President ula ai khublei ia ki sienjam kiba la shim da ka sorkar ha ka jingpyntreikam ia ka jingtei ia ki jingtei bapher bad ka kam jngohkai, ka Homestay programme, CM-Elevate bad Green Meghalaya bad ula ai khublei ruh ia u Myntri Rangbah ka Jylla u Conrad K Sangma bad ia ka Kynhun Myntri jong bad ia ki paitbah ka Meghalaya halor ka jingiaid shaphrnag ka Meghalaya.

Ha kane ka jingialang la iadonlang u Myntri Rangbah ka Jylla u Conrad K Sangma, ki Symbud Myntri Rangbah kiba kynthup ia u Bah Prestone Tynsong bad u Bah Sniawbhalang Dhar, u Myntri Sorkar u Bah Sanbor Shullai, u Chief Secretary u Dr Shakil P Ahammad, ki heh sorkar bad kiwei kiwei.