Khot ka sorkar ïa ka seng ki nongñiah kali tourist ban ïakren halor ki jingdawa

Ka All Khasi Meghalaya Tourist Taxi Association (AKMTTA) ka la pyntip ba ka sorkar jylla ha ka sngi Hatmajai ka la khot ia ki nongniah kali kamai ka jylla ban wan sha ka miej jingiakren ban iakren halor ki jingeh bad ki jingdawa ba sahteng jong ki.

U President ka AKMTTA u bah Ricaldinus Dohling ula iathuh ba ha kane ka jingiakren, ki nongniah kali kamai na Assam kin ym wan shim bynta hynrei yn iashim bynta tang ki nongniah kamai kali na jylla Meghalaya ha ryngkat ka jingdonlang ki ophisar bad ki Myntri sorkar na ka jylla Assam.

“Ka sorkar lashai ka sngi ka 8 tarik ka la khot iakren iangi ha ka por 11 baje mynstep,” ula ong.

U bah Ricaldinus ula ong ba lada lashai ka sngi ha ka jingiakren, ka mat jingiakren ka iaid beit bad lada ka sorkar ka ai ia ka jingdawa jong ki, ka AKMTTA kan iaid suk kynjai noh hynrei lada kam ioh kam banse kan shim da kiwei ki mat ba tyngeh.

Lah ban kdew ba ki mat jingdawa ka AKMTTA ka long ban thaw ia ki polisi ban tehlakam ia ki bar jylla ba kin ym rung shuh ha ki jaka jngohkai ha ka jylla bad kiwei de.

Ula ong ba katba ka jingiakren ka dang iaid bad ka sorkar, ki driabar ki lah ban kamai kumba ju long bad ula kyntu ia ki President bad Secretary jong ki District bapher bapher ba kin wan poi sha ka jingialang.

U President ka AKMTTA ula ong ba ha kane ka jingkhot iakren, ka sorkar kadei ban pynurlong ia ki mat jingdawa jong ki bad lada kim lah 100 percent ruh, 70 kadei ban pynurlong ia ki mat jingdawa. Lada ka sorkar jylla Meghalaya bad Assam kim lah ban pynurlong, ka AKMTTA kin shim ia ka rai ban kheinduh ia ka longbriew manbriew.

“ Ia ka rai ba mih na ka kamra ba iakren, ngin sa pynbna paidbah ha ryngkat ka jingdonlang jong baroh ki draibar. Lada ngi ioh ia ka khubor ba bha ruh ngin pynshai ha baroh bad lada ka sorkar ka dang sngap mynthi bad ka pan por, ngin shim rai hakhmat u paidbah lashai hi,” ong u bah Dohling bad bynrap, “ Lada ka sorkar kam pynurlong ia ki mat jingdawa, kin shim da kiwei ki sienjam namar ki mat jingdawa ba ngi buh kadei naduh u 2023 bad ngim don por shuh ban ai por.”