Leit jngoh u Myntri ia ka shnong Maikhuli Bthah ia u DC ban iakren bad ka Assam ban wanrah shongsuk hapdeng ki ar District

U MLA ka Jirang bad uba long ruh u Myntri ha ka Sorkar Jylla, u Bah Sosthenes Sohtun, mynta ka sngi u la leit mih sha ka shnong Maikhuli, Ribhoi District ban jurip ïa katei ka shnong, hadien ka jingjia kaba la wanrah ïa ka jingïakynad hapdeng ki nongshong shnong ka Maikhuli bad ki briew na Assam halor u pud u sam.

Ha ka jingleit jurip jong u, u Bah Sosthenes Sohtun u la pynlong ruh ïa ka jingïalang paidbah ha Madan Maikhuli, ha kaba la ïa kren halor ka jingshngaiñ, ka jingsuk bad ki sienjam ba donkam ban pynneh ïa ka shongsuk shongsain ha katei ka thain.

Ka jingjia kaba la pynmih ïa ka jingïakynad ka la jia ha ka sngi Saitjaiñ, ha kaba la Kynnoh ba ki briew na Assam ki la wan sha ka shnong Maikhuli bad ki la pynpra ïa ka kynroh jong ka skul. Ki la ker bad khang tala ruh da ki siej bad da kaba khang ruh ïa ka lynti ban rung sha Madan Maikhuli bad ïa kawei na ki lynti shnong.

Kane ka jingjia ka la wanrah ïa ka jingïakulmar, ha kaba ki nongshong shnong Maikhuli, kynthup ïa ki longkmie, ki la mih ban beh ïa kitei ki briew. Ka jingïakynad ka la nang jur haduh ba ka la poi sha ka jingïashoh ïadat hapdeng ki arliang.

Haba kren hadien ka jingïalang, u Bah Sosthenes Sohtun u la pynpaw ïa ka jingsngewsih halor ka jingjia ka ba la ktah ïa ka shongsuk shongsain jong ki nongshong shnong Maikhuli.

U la kdew ruh ba ha ki por kiba la dep la pynlong ïa ki jingïakren ban wanrah ïa ka jingsuk, kaba kynthup ïa u Magistrate ka Ri Bhoi bad ki nongmihkhmat na Assam, da ka jingthmu ban pynneh ïa ka shongsuk shongsain ha katei ka thain.

Hynrei, u la pynpaw ïa ka jingsngewsih ba ha katei ka jingïakren, na ka liang ka Assam la mihkhmat da ki briew kiba ym pat don ha ka kyrdan Magistrate, la ong u Bah Sohtun.

U Bah Sohtun u la ong ba un sa ïakren bad u Deputy Commissioner (DC) ka Ri Bhoi District ban pynlong biang ïa ka jingïakren bad u DC ka Kamrup, Assam, halor ka Peace Agreement hapdeng ki arliang district khnang ba yn lah ban wanrah ïaka suk ka saiñ ha katei ka thaiñ.