Shong Kyllain Mungor ki nongtrei PM Poshan, dawa pynkiew bainong

Ki nongshet ja sngi ha ki skul hapoh ka shatri Union of Cook cum Helper PM Poshan Meghalaya hynne ka sngi ki la pynlong ka jingiakhih da kaba shong kyllain mungor ha Khyndai Lad Shillong.
Kane ka jingmih surok ki nongshet ja ha ki skul ka dei namar ba wat hadien 22 sngi ba ki la sangeh leit shet ja ha ki skul, ka Sorkar Pdeng bad ka Sorkar Meghalaya kim la jubab ia ka jingdawa jong ki.
Haba kren sha ki lad pathai khubor ka president jong ka Union of Cook cum Helper PM Poshan Meghalaya ka Kong Gina Nengnong ka la ong, naduh u snem 2023 ka Union ka la thoh sha u Myntri Rangbahduh u Narendra Modi, Myntri ka tnat Pule Puthi ka Sorkar
Pdeng ban pynsngew ia ki mat jingdawa hynrei haduh mynta ka Union kam pat ioh satia ia ka jubab.
Ka Kong Gina ka la ong ba ka Union ka dawa na ka Sorkar Pdeng ban kyntiew ia ka bhah bainong na ka T.900 sha ka T.9000 shibnai namar ki nongshet ja sngi ha ki skul ki shem jingeh ban pyndap ia ki jingdonkam namar ba la kiew ki marbam bad kiwei ki mar matta.
Ka la ong ba ka rukom siew bainong ia ki nongshet ja ka dei 90% na ka Sorkar Pdeng bad 10% na ka Sorkar Jylla.
“Ka Sorkar Meghalaya ha u snem 2022 ka la pynkiew na ka T.100 sha ka T.1100 kaba mut T.2000 shibnai hynrei ka bhah jong ka Sorkar Pdeng ka dang dei beit T.900 shi bnai” la ong ka Kong Gina.
Ka la ong, ba ka jingiakhih kan iai bteng haduh ka 30 tarik u Nailur. “Lada pynsangeh ia kane ka scheme, ki khynnah bad ki longiing kiba duk kin mad jingeh. Ka scheme ka la iarap ia kiba bun ki khynnah. Ngi kyntu ia u Myntri Rangbahduh ka ri ban shimkhia mardor”ka la bynrap.
Ha kajuh ka por, ki nongshet ja sngi ha ki skul Jylla ha ri lum Jaintia ba hap hapoh ka Union of Cook Cum Helper PM Poshan ki la sangeh leit shet ja skul naduh 1 tarik mynta u bnai kum ka dak ka jingiakhih halor ka jingbymsngap ka sorkar pdeng ia ka mat dawa jong ki ba kan siew noh 9000 tyngka shibnai ka bhah ne honorarium na ka 900 tyngka ba ka juh siew, mynta ka sngi pat kine ki kynhun ki la pynlong sa da ka jingiakhih shong kyllaiñ mungor ha baroh ki district headquarters ka Jylla.
Ha kane ka jingiakhih shong kyllaiñ myngngor nalor ka jingdawa ban pynkiew jingsiew na ka 900 tyngka shibnai sha ka 9000 tyngka, la mih ruh ka sur dawa bteng ia ka skhim PM Poshan hapoh ka Ri lyngba ka sorkar kmie namar ba katkum ka 15th finance commission ka la kut naduh ka 31/03/26 ia kaba la bteng shipor naduh ka 01/04/26 bad ban kut ha ka 30/09/26.
Bad kumba long mynta la yn dang bteng ne em sa ha ka 16th finance commission ka sorkar pdeng kan sa rai shwa ban kut une u bnai september.
Haba ioh ban iakren bad u Advicer ka Union of Cook Cum Helper PM Poshan bah Khroo Lamsalanki Pariat ha ka jingiakhih shong kyllaiñ myngngor kaba la pynlong da ka All Jaiñtia Mid day Meal Workers Union ha Jowai u iathuh ba ka jingiakhih ki nongshet ja sngi ha ki skul kan bteng haduh ka 30 tarik mynta hi u bnai.
Bad mynta ka sngi ba pynlong ia ka jingiakhih shong kyllaiñ myngngor dei kaba la jam sha ka 22 sngi ka jingsangeh leit shet ja skul bad lyngba kane ka sngi ki kyrpad ruh ia u myntri ryngbah duh ka Ri u Narendra Modi kumjuh ki myntri ka sorkar kmie ba kin bteng biang ia kane ka PM Poshan nalor ban pynkiew jingsiew ruh ia ki.
U ong ka jingdawa bteng biang ia ka PM Poshan kaba tip mynshwa kum ka midday meal skhim dei namar ba ka la ai jingiarap bad kyrshan shisha ia kiba bun ki longkmie longkpa ba ki khun jongki kin leit shaki skul.
Nangta u kyrmen ba u Narendra Modi un shahshkor ia kane ka mat jingdawa jong ki hapoh une hi u bnai, kumba kila ioh jingkyrshan lang naki kynhun nongshet ka thaiñ northeast, bad ruh kumba naka liang u myntri ryngbah duh ka sorkar Jylla u Conrad Sangma lem kiwi pat ki myntri ryngbah jongki Jylla ka thaiñ northeast kila dep ai jingthoh sha u myntri ka tnat pule puthi ka sorkar kmie.