Kam don jingmut ban ujor ia ki MLA katba ka UDP ka dang iatreilang ha ka MDA: Pala

U President ka Meghalaya Pradesh Congress Committee (MPCC) u Bah Vincent H Pala hynne ka sngi ula buh jingkylli ia ka jingiai bteng ka UDP ban iatreilang bad ka kynhun synrop MDA hadien ba phra ngut ki MLA ki la leit iasoh sha ka BJP.

U Bah Pala ula ban ruh ba kam don jingmut ia ka UDP ban ujor pyrshah ia ki MLA ba phet seng haba ka dang bteng ban iadonlang ha ka Sorkar MDA.

“Watla ka BJP ka la shim noh ia ki MLA jong ki, Nga tharai ka UDP kan hap ban rai la kan dang iai neh bad ka BJP-NPP lane kin weng noh. Ki la dei ban shim ia ka rai lem kumta kam don jingmut ban ujor ba ki MLA ki la shah tan ha ka BJP lada phi dang iatreilang bad ki, ia bam lang bad ki bad iasam lang ia kiei kiei baroh bad ki” ong u Bah Pala.

U Bah Pala ula ong ba kaei kaba jia ia ka UDP ka dei ka bym khmih lynti bad ka BJP ka don ia ka khana ban pyntroin iala ki jong ki paralok ba iatreilang.

“Kam don eiei kaba thymmai namar ka UDP bad BJP kila iatreilang la bun snem bad ka shu dei tang ka jingkylla na ka UDP. Kane ka ju jia bad ka BJP-ha Maharashtra bad ka Shiv Sena, man ki party kiba iatreilang bad ki kila shah dung nadien. Kala jia wat ha Bihar bad ka JDU, ha Chennai bad ka DMK bad wat kiwei ki party ruh, kin pyrshang ban pynjot iala ki jong ki paralok” ula ong.

U la batai antad ba ka NPP kan dei kaba bud. “Kaba bud nga tharai nga la thikna ba kan dei ka NPP” ula bynrap.

Haba rkhie sammut ia ka UDP kaba kren bein ia ka Congress ha ka por ba ka mad ia ki jingeh, u Bah Pala ula ong ba mynta kala long da pyrdet.

“Ha ka por ba ka BJP bad ka NPP ki pyrshang ban khring ia ki MLA ka Congress na ngi, ka UDP kala rkhie bein ia ngi. Mynta haba ka BJP kala tan ia ki MLA jong ka, ka NPP iala rkhie bein ia ka UDP. Hadien haba ka BJP kala tan ia ki MLA ka NPP, kan dei ka jingrakhie ba khatduh” ula ong.