Ki MLA ba iasoh BJP ki dei kiba iohi jngai halor ki kam pynroi: ong u bah Sanbor

U nongialam ka Meghalaya Bharatiya Janata Party (BJP) ba dei ruh u Myntri Sorkar Bah Sanbor Shullai ula iaroh ia ka jingwan iasoh BJP ki MLA ka UDP ha Delhi bad ong ba ki paidbah ha Meghalaya kim ngeit shuh ia ka jingkynnoh lehbein khristan bad vote ia ka roi ka par.

Haba kynthoh ia kane ka jinglong jingman, u Bah Sanbor ula ong “Ki la iasoh ha Delhi. Nga kmen bha. Ka dei ka khubor sha ki paidbah ka ri-lum Khasi-Jaintia bad Garo ba ki dei ban iaroh ia kine ki MLA kiba don ka jingiohi jngai bad ka jingieid ia la ka constituency bad ka Jylla. Ki ishu ba ki la dawa ki dei kiba shonghok na ka bynta ka jingmyntoi ka Jylla jong ngi”.

U ong ka BJP ka la mad ia ki juh ki jingkynnoh kiba la mad da ka Congress shisien ka por.

“Ha ki por mynshuwa ki paidbah ki ju ong ba ka Congress ka dei ka seng nongwei bad kim pdiang ia ka, hynrei hadien ki la sngewthuh bad pdiang ia ka. Mynta ki kynnoh ba ka BJP ka dei ka party ba leh bein ia ki khristan” ula ong.

U Bah Sanbor ula kam ba ka jingdon jong ka BJP ka pynthikna ia ka jingkiew shaphrang.

“Lada ka BJP ka jop ha ki constituency, kin don shibun ki kam pynroi, ka shongsuk shongsain bad ka jingkiew shaphrang. Peit sha ka constituency jong nga bad kiwei ki constituency” ula ong.

Haba pynpaw ba ka jingmut jingpyrkhat u paidbah ka la kylla, ula bynrap “Haba nga leit sha ki prokram ha kylleng ka ri-lum Khasi-Jaintia bad Garo, ki paidbah ki ju ong ba ki la ngiah ia kiwei pat ki party bad mynta kin phaikhmat noh sha u Narendra Modi”.

“Ki paidbah kim pdiang shuh ia ki jingkynnoh lehbein khristam, kin pdiang ia ka roi ka par ka um, u khaw, ka gas ba la ai da u Modi, ki skhim nongrep, ka jingpynpoi bording ha ki jaka nongkyndong, ki surok bad lynti iaid kjat. Lada nujor bad ki 50 snem ba la leit bad haduh katno ka Jylla jong ngi ka la kiew ha kine ki 10 snem hapoh ka Sorkar BJP ba ialam u Modi. Ki paidbah kin ym shah ialam bakla shuh” ula ong.