Thud ki nongleit nongwan ba pynieng kali jot ha surokbah Nongpoh

Ka jingpyndonkam jong ki thanad pulit ïa ki bynta jong ka surokbah ban buh ïa ki kali ba la julor na ki jingjia aksiden ka la pynmih ïa ka jingwit ba khraw ïa ka leit ka wan ki paidbah ha Nongpoh bad ha kiwei ki bynta jong ka Ri-Bhoi.

Kine ki kali kiba la jot bad pra kiba la pynïeng harud jong ka surok Four Lane, kaba ym tang ba ka pynsniew dur ïa ka shnong, hynrei ka lah ruh ban wanrah ïa ka jingma ïa ki nongleit nongwan, khamtam ha ki jaka ba ka surok ka khapniah.

Haba ïadei bad kane ka mat, ka Ri bhoi Youth Development & Social Organisation (RBYDSO) hapoh ka jingïalam u President, Bah Arnold Syngkli, ryngkat bad u Secretary, Bah Kerbok Malai, ki la leit ban ïakynduh ïa u Deputy Commissioner bad ïa u Superintendent of Police ka Ri-Bhoi ban pynsngew ïa ka jingeh bad ban kyrpad ba dei ban pynkynriah noh ïa kitei ki kali kiba la julor na ki bynta jong ka surok.

Na ka liang ki bor district bad ki pulit, ki la pynpaw hakhmat ka RBYDSO ba kin shimkhia ïa kane ka mat bad kin peit ïa ki lad ki lynti ban pynbeit ïa kane ka jingeh.

Haba kren sha ki lad pathai khubor, u President ka RBYDSO, Bah Arnold Syngkli, u la ong ba ka jingbun jong ki kali kiba la julor kiba dang pynïeng harud jong ka surok ka pynwit shisha ïa ka leit ka wan jong ki paidbah. U la ong ruh ba ka jingkhapniah jong ka surok na ka daw jong kine ki kali ka lah ban pynlong ruh ïa ki jingjia aksiden.

Shuh shuh, u la pynpaw ba ki thanad pulit kiba dei ban long ki jaka treikam ki pulit ki la sdang ban paw dur kum ki jaka buh bad lum ïa ki kali kiba la julor, namar ka jingbun jong ki kali kiba dang sah ha kine ki jaka.

Shuh shuh u la ong, kane ka jingeh ka lah ban mih ym tang na ka liang jong ki pulit, hynrei lah ruh ban don bynta ki trai jong kitei ki kali kiba la julor, kiba ym pat wan ban shim noh ïa ki kali jong ki hadien ba la jia ki jingjia aksiden.

U President ka RBYDSO u la kyntu ïa ka tnad pulit bad khamtam ïa ka sorkar ba kin shimkhia noh ïa kane ka mat, da kaba pynkynriah ïa kitei ki kali kiba la julor sha kiwei pat ki jaka kiba biang.

Ka jinglah ban pynkynriah noh ïa kitei ki kali jot na kitei ki jaka, kan ym tang ban pynbeit ïa ka jingwit ha ka leit ka wan, hynrei kan long ruh ka jingshngaiñ jong ki paidbah haka leit ka wan bad kan wanrah ruh ïa ka jingkhuid, ka jingitynnad jong ka sor Nongpoh.