Ki Facilitation Centre ki dei ban don Food Court”

Ka Sorkar Jylla ka la ieng skhem ba ki Facilitation Centre ki dei ban don ia ki Food Court ban pynthikna ia ka jaka kaba biang ia ki kali ba kin pynieng bad ba ki nongleit nongwan kin ioh bam katba ki dang shah bishar bniah ia ki kot ki sla.

Ia kane la pyntip da u Symbud Myntri Rangbah ba khmih ia ka tnat kam Pohiing (Police) u Bah Prestone Tynsong bad ula ong ba ka Sorkar ka la bthah ia ki Bor District ban leh ia kaba donkam khnang ba ki Facilitation Centre kin long kiba bit ba biang.

Haba kren sha ki lad pathai khubor u Bah Prestone ula ong “Ka nongrim jong ngi ka long kaba shai. Ki Facilitation Centre ka hap ban don bad dei ruh ban donlang ka Food Court. Baroh ar ki dei ban iadonlang khnang ba kin don ki jaka kiba biang ba ki kali kin pynieng bad ba ki briew kin ioh ban jingbam, dih sha bad kiwei kiei”.

U Bah Prestone ula ong ruh ba ka Sorkar ka la bthah ia ki bor district ban pynthikna ban pynlong biang ka jingjurip lada donkam bad ka KSU khnang ba baroh ki kam kin iaid beit iaid ryntih ha shuwa ban pyntreikam noh pura iaka Facilitation Centre kaba don ha Umling Ri-bhoi District.

“Ngi la bthah ia ki bor district bad lada ki don kano kano ka jingartatien lane jingbym hun halor ka jing jurip ba nyngkong, ngi lah ban leit jurip biang sa 2-3-4 sien, ngim don jingeh ia kata. Lada ki jingsngewkhia ki long bad kiwei ki Tnad, ia kata ruh lah ban leh. Ngi ieh ha ka jingstad jong ki bor district ban pynthikna ba ki jingjurip kin long kiba hun” ula ong.