Pynlong Ka Shnong Saiden Ïaka Jingpynkhuid Shnong, Shim Khia U MLA Ban Pynurlong Ïaki Jingangnud Ka Shnong

Ka Shnong Saiden, Ribhoi District ka la pynlong ïaka jingpynkhuid shnong kaba shisien shisnem naka bynta ban wan rah iaka khuid ka suba hapoh ka shnong ka thaw bad la ia shimbynta ha kane ka jingpynkhuid shnong daki paidbah nongshong shnong naduh ki Rangbah, ki longkmie, ki khun samla bad ki hep kiba rit.

Kane ka ka jingpynkhuid shnong ka dei ruh kum shibynta ban ïa snohktilang haka program Swachhta Hi Seva kaba dei ka program jong ka sorkar kmie naka bynta ban kynmaw burom iaka sngi kha u Mahatama Gandhi.

Ha kane ka sngi, ka Dorbar Shnong Saiden ka la ïoh ruh ban plie paidbah iaka Public Toilet kaba la tei lyngba ka Chief Minister Special Development Fund CMSDF kaba la pynmang haka jinglut kaba 5.66 lakh tyngka ba ka shnong ka la ïoh pdiang na u Myntri Rangbah ka jylla u Conrad K Sangma haka jingwan ïuh kjat jong u ha ka shnong Saiden.

Ïa katei ka Public Toilet la wan ban plie paidbah da u MLA ka Umsning Constituency u Dr. Celestine Lyngdoh haka jingiadonlang u bah E Myrthong Rangbah shnong Saiden, u bah Shemphang Kharlukhi Secretary lem bad kiwei kiwei ki riew rangbah bad ki longkmie jong ka shnong.

Ha kawei pat ka bynta, naka liang ki nongïalam shnong ryngkat bad u MLA ki la leit ruh ban jurip ïaka lynti shnong kaba la donkam ban pynheh noh naka bynta ka jingbit jingbiang jong ki nongleit nongwan.

Ha ka jingïalang lyngkot ba la long ha ka Shnong Saiden, u MLA ka Umsning, u Dr. Celestine Lyngdoh, u la ai ka jingïaroh ïa ka Dorbar Shnong Saiden halor ka jingtrei shitom bad ka jingkitkhlieh ban pyntreikam bad pyndep hok ïa ki skhim pynroi bapher bapher kiba wan lyngba ka Sorkar.

Haba kren ha kane ka jingïalang, u Dr. Celestine Lyngdoh u la pynpaw ba ka Shnong Saiden ka dei kawei na ki shnong ha ka thaiñ Umsning kaba don ka jingïadei kaba jan bha bad u. U la kdew ruh ba ha kine ki por, u la dep ban wanrah bad pynurlong ïa bun tylli ki kam pynroi ha kane ka shnong na ka bynta ka jingmyntoi jong ki nongshong shnong.

Shuh shuh, u MLA u la kular ruh ban ïai don ryngkat bad ka shnong, khnang ban nang lah ban wanrah shuh shuh ïa ki kam pynroi bad ki jingkylla kiba donkam na ka bynta ka bha ka miat jong ki paidbah.

Ha kajuh ka por, u la pynpaw ba un shimkhia ban ïakren bad ka Tnad Urban Affairs halor ka jingdonkam ban pynurlong ïa ki surok shnong kiba lah ban ïaid kali (motorable roads), kiba long kiba donkam kyrkieh na ka bynta ka Shnong Saiden.