U MLA ka West Shillong u bah Paul Lyngdoh ula ong ba ka jingkyllon noh jong ka UDP ka dei na ki daw bah kiba bun, hynrei um kwah ban kren eiei namar ba u la mih noh na ka kane ka party.
Haba kren sha ki lad pathai khubor u bah Paul ula ong ba kane ka long ka jingjia ka bym ju jia koit ha ka sain pyrthei ha kaba hapoh ka 40 sngi, ka seng kan hiar na ki 12 ngut ki MLA sha uwei u MLA.
“ Mynta ngam don bynta shuh ha ka UDP kam iahap ianga ban kynthoh eiei hynrei kumba la tip ba ka jingkyllon noh ka UDP ka long kaei kaei ka bym pat ju jia namar hapoh ka 40 sngi, ka seng kan hiar na ki 12 ngut ki MLA sha uwei u MLA. Kum ki nongthoh khubor phi lah ban tih bniah ban lap ia kaei ka jinglong jingman jong ka party,” ong u bah Paul.
Kum ban shu pynkynmaw dang shen u bah Paul ha ryngkat arngut ki MLA kiba kynthup u bah Renikton Tongkhar bad u bah Nujorki Sungoh, ki mih na ka UDP da kaba leit iasoh sha ka NPP. Katba kiwei ki 8 ngut ki MLA ka UDP dang shen kila leit ban pyniasoh sha ka BJP. Na ka jingmih kine baroh, u bah Metbah ula sah marwei kum u MLA ka UDP.
U bah Paul Lyngdoh ula ioh ia ka shuki Myntri sorkar hadien ba u bah Metbah Lyngdoh dang shen ula iehnoh ia ka kam kum u Myntri ka tnad bording ka sorkar jylla.
You may also like
-
Ha ka sien nyngkong pynlong jingialang ka Joint Parliamentary Committee halor ka FCRA Bill ha Shillong
-
Hab sah iing wai ki nongtrei ka Hospital Mynnar Jirang, mad jingeh ki nongpang
-
Pynkup burom u MLA ia ki riew rangbah, ki samla pule bad nongialehkai
-
Bteng ka Assam ban klun jaka ha Meghalaya
-
Thmu ka Meghalaya ban pyndonkam hok ïa ki Free Trade Agreement ban pynïar ka jingshalan mar