Pyrshang kerkut ki Dkhot ka JAC ia u Bah Sanbor

Ka jingialang kaba la lum da u MLA ka South Shillong Constituency u Bah Sanbor Shullai ban iakren halor ka Ropeway Project ha Madan Laban kam shim la poi shano shano, haba ki dkhot ka JAC kila kyntait ia ka jingtyrwa ban thaw ia ka Expert Committee ban khmih ia ka jingshah ktah ka mariang na ka Ropeway bad haba u Bah Sanbor ula pynwai noh ia ka jingialang ban ieh beit noh ha ka sorkar ba kan shim ia ka rai nangne shakhmat, ki dkhot ka JAC kila pyrshang ban kerkut ia u Bah Sanbor.

Kane ka jingialang kaba la pynlong ha State Convention Centre la wan ban iashimbynta da ki nongialam jong ki Dorbar Shnong, ki Seng Kynthei, Seng Samla bad kiwei kiwei ki kynhun kiba don hapoh jong ka South Shillong Constituency ryngkat bad ki dkhot jongka JAC Against Ropeway Project.

Haba u Bah Sanbor Shullai ula pynpaw bad tyrwa ha ka jingialang ban kyrpad ban thaw ia ka Expert Committee ban tohkit ha kaba iadei bad ka jingkynnoh ba kan don ka jingktah ia ka mariang. Hynrei ki dkhot ka JAC kila pyrshah ia katei ka jingtyrwa bad haba ka jingiakren kam shim la poi shano shano la pynwai noh ia ka jingialang bad ban ieh beit noh ha ka sorkar ba kan shim ia ka rai.

Haba u Bah Sanbor ula mih noh na katei ka jingialang kala don ka jingpyrshang jong ki katto katne ban bat bad ban kerkut ia u hynrei ki pulit bad ki nongkyrshan jong u Bah Sanbor kila iada bad ialam beit noh ia u Bah Sanbor sha kali bad la phah mih noh ia na katei ka jaka ioh ka mih kano kano ka jingjia.

Ki dkhot ka JAC kila hylla bad pyrta ba u Bah Sanbor Shullai udei ban hiar shuki noh bad kila dawa ba dei ban pynduh pyndam noh ia ka Ropeway Project bad dei ban pynkynriah noh sha kiwei pat ki jaka.

Ka Nongialam ka JAC ka Kong Angela Rngad kala kynnoh ba u Bah Sanbor ula pynwai noh ia ka jingialang hadien ba ula dep ban pynsngew ia ka jingthmu jong ka sorkar bad ula ailad tang ia 2 ngut ki kynthei ban kren ha ka jingialang bad ula mih noh bad kane kala pynbitar ia ki.

“U Bah Sanbor hapoh ka jingialang ula wanrah ia ka jingai jingmut ban tyrwa sha ka Sorkar ban don ia ka Expert Committee, ngim donkam Expert Committee shuh. Sa kawei ruh u dei u nongmiohkhmat paitbah, ka kamram ka jongu kadei ban pynsngew ia kaei kaba ki paitbah ki lynga ym ban wanlam ia ka khubor na ka Sorkar, namar lah kata sngi u lah dei ban sngewthuh kaei kata ka jingangnud jong ki paitbah”.

“Ka kamram jong u nongmihkhmat kadei ban iasaid ban leit pynsngew ia ka jingsngew jong ki paitbah, kata kadei kaba la pynkup bor da ka riti synshar ka ri. Hynrei une u wanlam da ka kot ban pule tip kaba la thoh da mano bad ka JAC ka kyntait ia kata bad ka JAC kam pdiang ia kato ka kot kaba la pule hangtei” la ong shuh shuh ka Kong Angela.

Ka Kong Angela kala ong, ba ka jingthmu ban khot ia kane ka jingialang ka long ban pynbor ia ki nongshong shnong ka South Shillong ban pdiang bad ia ki nongshong shnong ka sor Shillong hi baroh kawei namar kam dei shuh tang ka ishu jong ka South Shillong.

Hadien ba u Bah Sanbor ula mih noh na State Convention Centre, ki dkhot ka JAC kila ialum shipor ha katei ka jaka bad hadien kane kila mih noh.