Yn tei ïa ka Critical Care Block ha Williamnagar Civil Hospital

Ka Myntri ka Koit ka Khiah ka Kong Ampareen Lyngdoh hynne ka sngi, kala buh ia u mawnongrim ban tei ia ka Critical Care Block ha Williamnagar Civil Hospital, East Garo Hills District kum shi bynta ban kyntiew ia ka jingai jingshakri ia ki paidbah ha ka liang ka koit ka khiah. Ha kane ka jingbuh ia u mawnongrim la ia donlang u Myntri ka tnad PHE u Marcuise N. Marak, u Commissioner Secretary ka Health & Family Welfare u Joram Beda, u Deputy Commissioner ka East Garo Hills u Vibhor Agarwal, u Joint Secretary ka Health and Family Welfare T.G. Momin, ki nongshong shnong ka thaiñ bad kiwei kiwei.

Ka Kong Ampareen Lyngdoh kala ong ba ka sorkar jylla ka iengskhem ha kaban pynbha bad pynjanai ia ki jaka ai jingsumar ban pynthikna ba ki nongshong shnong ka jylla kin ioh jingmyntoi ha ka jingioh ia ka jingsumar bad ban ioh ia ka jingim kaba bha. Kala pynpaw ruh ia ka jingsngewnguh ia u Myntri Rangbah ka jylla uba la don iaka jingiohi jngai kum u nongialam ha kaba ula shimkhia na ka bynta ban kyntiew ia ka koit ka khiah ha ka jylla

Kane ka Critical Care Block kan don ia ki tiar ki tar bad ia ki kor ki bor katkum kane ka juk kaba mynta ban ai ka jingsumar ia ki nongpang kiba don hapdeng ka jingma ne kiba shitom jur. Kan don ïa ki kor kiba latip kum ki Advanced Monitoring System, Life-Support Technologies bad kin don ruh ki nongtrei kiba la tbit bha ha ka kam bad la khmih lynti ba ka jingdon kane ka Critical Care Block  kan kyntiew shibun ïa ka rukom ai jingsumar ha kane ka thaiñ, kaban ai jingmyntoi ym tang ïa ki nongshong shnong jong ka Williamnagar hynrei ïa ka East Garo Hills District baroh kawei.