Kiew 664 ngut kiba ioh pang AIDS ha Ri Bhoi

Ka tnad jong ka Meghalaya AIDS Control Society lyngba ka ophis u District Integrated Strategy for HIV/AIDS da ka jingiasnohkti lang ka ophis u District Medical and Health Officer, Ri Bhoi District mynta ka sngi ka la pynlong ia ka jingrakhe ia ka World AIDS day 2024, ia kaba la pynlong hapoh ka Iingdorbar jong ka Labansaro ha Umroi. Ia kane ka program ban rakhe ia ka World AIDS day kaba la pynlong ruh halor ka phang pdeng ‘Take the Right Path’ la pynlong kyrpang ruh ban ai jingpynshai halor kane ka jingpang bad ia ki lad jingiada lyngba ki jingsumar bapher bapher.

La wan ban ia shimbynta ha kane ka sngi, da u Bah Damanbait Lamare, MLA ka Umroi Konstituensi kum u kongsan, ha ka jingiadonlang ruh u Bah R. Kharbuki, MDC ka Umroi, ka Dr. A. Kharduid, District Medical and Health Officer, ka Dr. E. Kalwing, District AIDS Control Officer, ki nongialam shnong bad kiwei kiwei. Haba kren ha kane ka sngi, ka Dr. E. Kalwing ka la iathuh, halor ka jingdonkam jong ki riew paidbah ban wan shakhmat ban ai ia ka jingiatreilang ban pynduhjait ia kane ka jingpang lyngba ki lad jingsumar kiba la don lypa. Ka la iathuh ruh, ba ha Ri Bhoi District ki don palat 664 ngut kiba ioh ia kane ka jingpang AIDS bad 400 kiba dang shah sumar na bynta kane ka jingpang, don ruh kiba la koit na kane ka jingpang bad don pat ki bym shem la pyndep ia ki jingsumar namar ki daw kiba bun kumta la kyrpad ia baroh kiba ioh ia kum kane ka jingpang ba kin shimkhia ban wan shakhmat ban phah sumar ban lait na ka jingsaphriang bad ka jingma ia kiwei pat ki riew paidbah.

Haba kren kum u kongsan, u Bah Damanbait Lamare u la ai ka jingiaroh kaba khraw ia ka tnat jong ka Meghalaya AIDS Control bad kiwei kiwei ki tnat kiba la mih shakhmat ban rakhe ia kane ka sngi kyrpang bad ruh ban ai jingtip jingpynshai halor ka jinglong kongsan jong ki lad jingsumar ia ka jingpang HIV/AIDS kaba dei ka jingpang kaba ktah ia shibun ki jingim ba kordor jong ki riew paidbah. U la pynpaw ruh, ba watla ka jingtreishitom jong ki tnat treikam sorkar ban rad dyngkhong ia kane ka jingpang hynrei ka jingbym shimkhia jong ki riew paidbah ban wan shakhmat ban ai ka jingiatreilang ka long kaba pynduh mynsiem ia ki nongtrei kiba aiti met bad mynsiem ban sumar ia kane ka jingpang, kumta u la kyntu ia ki riew paidbah ba kim dei ban sngewpher ne don kano kano ka jingsngew tieng ne riej hynrei ban wan shakhmat ban pyndep ia ki jingsumar kiba kongsan.