Dei ban talasi ki kali ba rung ha Jylla ban rat dyngkhong ïa u drok

U MLA South Shillong u Bah Sanbor Shullai u la iai ban baka Sorkar Jylla kadei ban pynkhlain iaka rukom talasi iaki kali kiba rung shapoh Meghalaya khnang ban pynthikna ba u drok, um ioh lad ban rung shaki shnong ki thaw jong ka Jylla. Ïa kane u Bah Sanbor u la kren hadien ka jingïalang bad ki Rangbah Shnong bad ki nongialam Niam kiba hap hapoh ka Municipal Area haka jindgon lang ki ophisar na ka ophis Deputy Commissioner, East Khasi Hills, Superintendent of Police East Khasi Hills, Anti-Infiltration Branch, Anti-Narcotic Task Force (ANTF) bad na ka ophis u Labour Commissioner. Haba kren sha ki lad pathai khubor u Bah Sanbor u la kyntu iaka Sorkar Jylla ba pynkhalain iaka tnat Anti Infiltration Branch bad ka Anti-Narcotic Task Force ban talasi ia ki kali kiba rung shapoh ka Jylla lyngba ki khyrdop kum naka thaiñ Jaintia Hills, Ri-bhoi bad West Khasi Hills. U Bah Sanbor u la pynksan ba ka jingrung u drok hapoh ka Jylla kadei lyngba ka jingwan naki khyrdop mih, kata na rilum Jaiñtia, West Khasi bad na Ribhoi District kiba wan napoh ka Jylla Manipur, ka ri Myanmar, Bangladesh bad kiwei kiwei.

“Shisien ba la pyrkhing ia ki khyrdop rung bad khyrdop mih jong ka Meghalaya, yn sa lah ban tehlakam ia ka jingwan rung jong u drok bad tang hapoh shisnem nga thikna ba kin sa duna ki nongkyrni drok ha baroh kawei ka Jylla” la ong u Bah Sanbor. U Bah Sanbor u la ïathuh ba haka jingïalang ki nongwan shim bynta kila pynpaw halor ka jingduna ki jaka sumar (Rehabilitation Centre) ba la pyniaid da ka Sorkar. U la pyntip ba u la ai jingmut ia u Myntri Rangbah ha ka jingialang jong ka MDA ban wad jaka ha Mawdiangdiang na ka bynta ban shna ia ka Rehabilitation Centre bad kumjuh ruh ba ki District Social Welfare ruh kin wad jaka ban shna ia ki Rehabilitation Centre. “Ynda la ioh jaka, ngin sa pynkhreh ia ka Detailed Project Report (DPR), ban leit pynsngew sha u Myntri Rangbahduh ka ri u Narendra Modi, ha u Myntri ka tnat Kam Pohing u Amit Shah bad u Myntri ka tnat Social Welfare ban mang pisa ban pyntyllun ia ka kam shakhmat” u la ong.

Kane ka jingïalang halor u drok kadei hadien ka jingkharoi jong ki nongdih drok, ka jingwan rung be-aiñ ki mynder ri na kiwei pat ki ri shapoh ka jylla Meghalaya, ka jingshah prong tuh ki ing ki sem bad ki jaka mane Blei ba la jia ha kine ki khyndiat taiew bad khyndiat bnai ba la leit noh. U Bah Sanbor u la ban ruh halor ka jingdonkam ban pynkhlain iaki Village Defence Party (VDP) hala ki shnong bad u la ïathuh ba shen un ïakren bad u Myntri Rangbah bad u Symbud Myntri Rangbah ba khmih iaka tnat kampohing (Police) ban shim ki sienjam ban pynklain iaki VDP bad ban iatreilang bad ka tnat Police ban iakhun pyrshah drok. Nalor kane u Bah Sanbor u la iathuh ba ha ka jingialang la ai jingmut ban pyndait ia ki CCTV Camera ha manla ki shnong bad u kyrpad ia ka Sorkar Jylla ba kan bthah ia ka tnat Pulit ba kan pynjur ia ka jingiaid pahara khamtam ha ka por mynmiet khnang ban khanglad ia ka jingjyllei ki kam tuh kam thiem namar u drok.