Yn iakhun u bah Pyniaid na Nongtymmai, u Kimfa na Rymbrai- Jyrngam

Ka Seng Sain Pyrthei National People’s Party (NPP) hynne ka sngi ka la pynbna paidbah ia ka kyrteng ki 38 ngut ki kyrtong ban iakhun ia ka elekshon MDC na Khasi Hills Autonomous District Council bad Jaintia Hills Autonomous District Council. Ia kane ka thup kyrteng ki kyrtong banyngkong, la pynbna da u Working President ka NPP Meghalaya u Bah Hamletson Dohling ha ryngkat ka jingiadonlang ki nongialam ka seng. Ha ka thup ba 38 ngut ki kyrtong ba la pyllait hynne ka sngi, ki kynthup 18 ngut ha KHADC bad 20 ngut ha JHADC.

Kiba kham pawkhmat na18 ngut ban iakhun ha KHADC ki kynthup u CEM Bah Pyniaid Sing Syiem na Nongthymmai Constituency bad kynriah noh na Sohryngkham bad u Chairman KHADC u Bah Lamphrang Blah na Mawphlang-Diengiei Konstitwensi. Ki Executive Member bad ki MDC kiba la ioh tiket ki kynthup ka Kong Grace Mary Kharpuri na Nongskhen, Kong Macdalyne Sawkmie Mawlong na Umsning, Bah Rangkynsai Kharbuki na Umroi, Bah Alvin K Sawkmie na Mawsynram, Bah Fantin J Lakadong na Laitumkhrah-Malki, u Bah Carness Sohshang na Mawkyrwat, u Bah Batskhem Ryntathiang na Mairang-Nongkhlaw.

Katba u MLA bad MDC barim ka Rambrai-Jyrngam u Bah Kimfa S Marbaniang un biang ia ka ilekshon MDC na Rambrai-Jyrngam ha jaka u bah Bajop Pyngrope ba dei ruh u kynum jong u. Katba ha JHADC u CEM u Bah Thombor Shiwat ula ioh tiket ban iakhun na Moodop Umladang, u Chairman ka JHADC u Dr Sankey Shangpung un iakhun na Bataw-Lakadong bad kiwei ki MDC ba mynta ki la ioh biang ban iakhun ilekshon MDC na ka NPP.