Buh ka sorkar shadien ia ka pule punthi: VPP

Ka Voice of the People Party (VPP) ka la pynpaw ia ka jingsngew khia halor ka jingkhang ka sorkar ia ki skul baroh kiba hap hapoh ka thain jong ka Municipal, namar ka jingdon ka Concert ba wan rwai u Bryan Adam lashai ka 10 tarik Nohprah ha Polo. Ka VPP ka la ong ba kam pyrshah ia ka jingthmu ka sorkar ban pynlong ia ka concert  hynrei ka jingkhang ia ki skul tang na bynta ba wan rwai u Bryan Adam, ka long kaba ialam bakla. “Ka sorkar ka ialam bakla, ha ka jaka ban buh shwa ia ka pule puthi hakhmat ka la buh pynban ia ka tamasa lehkmen ha khmat,” ong ka VPP.

Ka VPP ka la kynnoh ruh ba kane ka jingleh ka sorkar ka ialam bakla ia ki paidbah tang namar ba ka kwah ban kyntiew ia ka Shillong kum ka nongbah ha ka leh sngewbha ka “Rock Capital”. Hynrei kaba sngewsih ka long ba kam don ia kino kino ki policy na bynta ban kyrshan pat ia ki nongrwai nongtem na kane ka jylla. “ Ki nongrwai nongtem ka jylla kiba don ia ka sap ban kyntiew ia ka thain , ki la shah kyntait tang namar ba ka sorkar ka pyllut bad theh na bynta ki nongtem kiba wan na shabar ka ri,” ong ka VPP.

 Lada ka sorkar ka don ia ka jingthmu ban kyntiew ia ka Shillong kum ka shlem ka put ka tem ka rwai ka siaw, ka sorkar kadei ban shim ia ki lad ki lynti ban pyllut na bynta ki briew kiba donsap ha ka jylla. Na ka liang ka VPP ka la dawa ba ka sorkar kadei ban pyrkhat bha ia kane bad kadei ban buh ia ka pule puthi shwa hakhmat bad kadei ban thaw ia ki policy na bynta ban kyntiew ia ka kam rwai bad ka put ka tem ha kane ka jylla.