Ban tehlakam ia ki bar jylla ba khaii be-ain

Ka Executive Committee ka Khasi Hills Autonomous District Council (KHADC) hynne ka sngi ka la rai ban rah katto katne ki Rules ha ka Dorbar Tlang ban ioh jingmynjur ban ym shah ot kilo ia ki mar rep bad ban phah rejistar ia baroh ki nongdie madan ba hap hapoh u pud jong ka Council. Haba iakren bad ki nongthoh khubor hadien ba la wai ka jingialang, u Chief Executive Member ka KHADC u Bah Pyniaid Sing Syiem ula ong, ka jingshna ia ka Khasi Hills District Establishment, Management and Control of Market Rules 2024 la pynshong nongrim na ka Khasi Hills District Establishment, Management and Control of Market Amendment Act 2023 bad lyngba kane ka Rules lah buh ia kawei ka kyndon ba kan ym don shuh ka jingot kilo ia ki mar rep ha ki 5 tylli ki District ba hap hapoh ka KHADC. U CEM ula ong, ka Council ka la ioh ka bor lyngba ka aiñ ban don ia ka Sub Committee bad ha kane ka Rules kan kham pynshai ba kan ym don shuh ka jingot kilo la ka long ha ki iew ka District Council, Hima, Shnong ne ki riew shimet bad kan don ruh ka Committee ban rai pynshitom ia kino kino kiba leh pyrshah ia kane ka Rules halor ka jingot kilo ia ki marrep.

U Bah Pyniaid Sing Syiem ula ong, ka EC ka la rai ba ki nongdie madan ba hap hapoh u pud jong ka District Council kin hap ban rejistar ia lade bad ki bym dei Khasi kin hap ban shim da ka Trading License bad kin ym lah shuh ban shu shong die jingdie pathar ha lynti ne rud surok lane ha kino kino ki jaka iew, jaka paidbah khamtam ki bym don ia ka Trading License. Ula ong, ka jingai Trading License kan long katkum ki kyndon ka Trading by Non Tribal Regulation 1954 bad kiba aplai kin hap ban ioh ia ka jingithuh na ka Dorbar Shnong, trai dukan ne trai jaka bad yn sa ai ia ka Trading License bad ki bym biang ia ki kot ki sla kin ym ioh satia ia ka Trading License.   “Kane ka Rules ka long ka donkam ban pynkhlain shuh ia ka Market Act kaba ngi la ioh jingmynjur na u Lat bad ia kane ka Rules ngin sa rah ha ka Dorbar Tlang ban wan” la ong u CEM bad ula bynrap baroh ki kyndon ha ka Rules yn pynbna hadien ba la mynjur ka iing Dorbar ka ban sdang naduh 19 tarik mynta u bnai.

U la bynrap bun ki jaka ha sor Shillong la shong die madan da ki briew kiba ym lah ban ithuh ki wan na ei, la ki don ne em ki kot ki sla ba biang bad ym lah ban tip ki lah ban dei na Bangladesh kiba rung sha kane ka jylla. Kumjuh ula pynshai ka jingbthah ia ki Khasi ban rejistar ka dei hadien ka Council ka jingleit khynra la lap ba ki nongdie madan kim dei ki Khasi hynrei la kam trai pat da ki Khasi. U la ong, ba ki iakynduh ia u Myntri pynroi Sor bad ia u Myntri kam jngohkai ka Jylla u Bah Paul Lyngdoh ban pynpaw ia ka jingsngewkhia bad ki la kyntu ba ym dei ban ai pathar ia ki nongdie madan hynrei ban peit bha shwa ban ai jaka ia ki nongdie madan, namar bun ki briew jong ngi ba wad kam kim ioh bad wat ban shong madan ruh kim ioh, hynrei ki briew ba nabar pat ki ioh ban die madan ha ka jaka sorkar.