Weng noh u bah Pathaw na ka EC ba ïalam ka NPP ban ïakhun kum kyrtong shimet

U MDC ka Mawlai konstiwensi u bah Teiborlang Pathaw hynne ka sngi u la leit ban aiti ia ka shithi iehnoh kam kum u Executive Member ka KHADC. Ia kane ka rai u bah Teiborlang ula shim hadien ba u la pynbna paidbah ba un iakhun ia ka ilekshon MDC kum u kyrtong shimet na Mawlai Konstiwensi. Haba kren sha ki lad pathai khubor, u bah Teiborlang ula ong, “Nga la aiti ia ka shithi iehnoh kam na ka EC bad nga la weng noh ia lade na ka Executive committee ba ialam da ka NPP, na bynta ban pyndep ia kaei kaba nga la kular sha ki paidbah.”Halor ka jinglong dkhot ha ka NPP, u bah Teibor ula ong ba u la dep ban phah ia ka shithi sha u nongialam ka NPP Meghalaya u bah Prestone Tynsong ban pyntip ba u la iehnoh ia ki kam baroh ba u bat ha ka seng NPP naduh ka jinglong dkhot jong u kum u President ka Shillong City.

“Mynta ka sngi nga la phah ia ka shithi ba nga la ieh noh kam ia ka jinglong dkhot jong ka seng National People’s Party (NPP) bad ki kam ba la bynshet hanga nga la iehnoh baroh,” ula ong. Haba kylli halor ka jingkynthoh ba un sa rung biang sha ka NPP hadien ka ilekshon, na ka liang u Bah Teibor uba la pynpaw ba u paidbah u dei uba halor, u la pynthikna ba lada u jop ia ka ilekshon ruh un neh beit kum u MDC laitluid bad un kohnguh beit ia kaei kaba u paidbah u rai.

Lah ban kdew ba ha kane ka sngi Saitjain ka 4 tarik Kyllalyngkot, u bah Teibor ula pynbna paidbah ha ka jingialang ba long ha Mawlai, ba ula rai ba un iakhun kum u kyrtong shimet namar ba ki paidbah ki kwah ia u ba un law noh ia ka sopti (Jersey) Kot ka NPP,  ba um kwah ban iaid lait ia ka mon jong u paidbah.