Pakhang lynti ki paidbah ia ki Magistor Pulom ka Public Hearing ban tei jaka theh nuit ha Nonghali

Ki bor District hynne ka sngi ki la hap ban pynsangeh noh ia ka Public Hearing ban tei Waste Management Plant lane jaka theh nuit ha Lum Sohlait namar ka jingiai pyrshah ki paidbah nongshong shnong. Haba pynbna ia kane ka ADC ka East Khasi Hills ka la iathuh ba kane ka jingpynsangeh ia ka Public Hearing ka dei namar ka jingpakhang lynti ki nongshong shnong ia ki officer ka Meghalaya State Pollution Control Board (MSPCB) ban leit sha ka jaka ba thmu ban pynlong ia ka Public Hearing. “Ngi la pyrshang ban leit sha ka jaka ba la pynbeit ban pynlong ia ka Public Hearing hynrei naduh mynstep ngi la shah pakhang lynti noh ha ki nongshong shnong” la ong ka ADC. Ka la ong ba ka jingthmu ban pynlong ia ka Public Hearing ha Nonghali la leh katkum ka ain bad la pyntip paidbah lyngba ki Kot Khubor ym duna 30 sngi.

Ha shuwa kane ki paidbah ha ka jingïalam ka Synjuk Ki Nongsynshar Shnong Par Umkhen ha ryngkat ki nong shong Nonghali bad ki shnong ba marjan na Ri-bhoi District, East Khasi Hills bad West Jaintia Hills ki la khanglad ia ki bor Sorkar kynthup ki Magistrate bad ki Pulit ban leit sha ka jaka pynlong ia ka Public Hearing ha shnong Nonghali. Naduh dang step ki paidbah ki la ker da ki maw, ki dieng ia ka surok hapoh ka shnong Jaroid hashuwa ban poi sha ka jaka pynlong ia ka Public Hearing hapoh Nonghali. Kane ka Public Hearing ka dei na ka bynta ban tei ia ka Waste Management Plant ha u Lum Sohlait hapoh ka shnong Nonghali.

Ha ryngkat ki Pla Card, ki paidbah ki la pynpaw ba ki pyrshah ban buh ia ka Waste Management Plant ha u Lum Sohlait namar kane kan ktah ym tang ia ka mei mariang hynrei wat ia ka koit ka khiah ki nongshong shnong ba marjan. Ki la pynpaw ba naduh nyngkong ki la phah shithi sha ki bor Sorkar ban pynpaw ia ka jingpyrshah ban buh ia ka Waste Management Plant ha u Lum Sohlait, hynrei haduh mynta ka Sorkar kam jubab ia ki shithi pyrshah hynrei ka leh da ka bor ban pynlong beit ia ka Public Hearing.