Ka ‘Cabinet Retreat’ ha Sohra ban tip ki jingeh ki paidbah bad ki kam pynroi

Ka jingialang ka kynhun Myntri ba la pynlong ha Sohra ne ka Cabinet Retreat ba ar sngi ka la kut ha ka sngi Saitjain hadien ka jingiamir bad ki tnad sorkar bapher hapoh ka jingialam u Myntri Rangbah ka jylla u Conrad K Sangma. Ha kane ka Cabinet Retreat, ki ophisar sorkar na ki tnad bapher ki la pynpaw ia ki jingeh ki iakynduh bad kumjuh la iakren ban shim ki lad ki lynti ban weng ia kitei ki jingeh ban kyntiew ia ka roi ka par ha jylla baroh kawei. Ha ka jingialang ki tnad sorkar ki la ioh ban ia kynduhlang ka rynsan ha ka jingdonlang ki Myntri Sorkar ki ophisar ka jylla ban pynsngew ia ki jingeh khamtam ha ka pule puthi bad ka koit ka khiah.

U Myntri Rangbah u Conrad Sangma ula bthah ia ki ophisar ban iatreilang bad ki nongshong shnong ban urlong ia ki projek kam pynroi ha ka thain bad ka jylla bad ula pynpaw ba ka jingialang ka long kaba seisoh. “Ka jingiatai ka long kaba seisoh bad nga kyrmen kan long ka lynti ba ngi lah ban pynwandur thymmai ban iaid shakhmat ha ki kam pynroi. Ka bynta ba kongsan ka long ban don ka jingtreilang na baroh ki liang ban pynurlong ia ka thong kaba ngi don, ryngkat ka jingbuddien man ka por ia ka jingpyntreikam ia ki skhim bad ki projek” la ong u Conrad.  U la kyntu ia baroh ki tnad sorkar ba kin buh thong ha ka rukom treikam ban thikna ban pyndep ia ki kam hapoh ka por. U la kyntu ruh ia ki ophisar bad myntri sorkar ba ki dei ban leit jurip man ka por ia ki jaka bad ban wanrah jingiajan bad ki paidbah bad ban ioh ia ki jingtip ia ka jingdonkam bad ki jingeh ki paidbah.

 Katba u Chief Secretary ka jylla u Bah DP Wahlang ula iaroh ia ka Cabinet Retreat ha Sohra hapoh ka jingialam u Myntri Rangbah ka jylla da kaba ong. “Ka long kaba ai mynsiem ia ki ophisar ban pynleit ia ki kam pynroi. Kane ka dei ka prokram nyngkong hapoh ka jylla bad ka Ri, bad dei ban pyntip ruh sha u Myntri Rangbahduh ka Ri”.