Ka Sixth Schedule ka kham khlaiñ ïa ka Article 371 ha ka Riti synshar ka Ri:Pala

U President ka Meghalaya Pradesh Congress Committee (MPCC) u bah Vincent H Pala ula ong ba ka VPP ka dei ban pynshai paidbah la ki kwah ban pynneh pynsah ia ka riti dustur ne ki kwah ban wanrah ia ka article 371. Haba kren hynne ka sngi, u President ka MPCC u bah Pala ula ong ba ka VPP ka dei ban pynshai sha ki paidbah la ki kwah ban pynneh pynsah ne kin pynkylla namar ba ki nongialam jong ka party ki la rah hapoh ka iing dorbar ba ki kwah ia ka 371, hynrei mynta ki kwah ia ka sixth schedule.

Katkum ka jingong u bah President ka MPCC u la ong ba ka Sixth Schedule ka riti synshar ka ri India, ka kham khlain ban ia ka Article 371 ka riti synshar ka ri. “Ka article 371 ka iapher na ka 6th schedule, namar ba ka article 371 ka bor ka shong ha ka sorkar jylla katba ka bor ha ka 6th Schedule, ka khyndew ka shyiap, ka riti dustur ka hap ha ka district council katba ka article 371 ka dei ka bor kaba kyrpang ban ai ha ka sorkar jylla,” ula ong. U la bynrap, “Ki paid-bah kin ai ia ka rai, lada ki kwah ban aiti ia ka khyndew ka shyiap, ka riti dustur sha ka sorkar jylla ne kin sah ha ki riew shimet, ha ki shnong, ki raid ne ki hima.”

U la ong ba ka Congress ka ieng ban pynkhlain ia ka Sixth Schedule, ban pynneh ia ka riti dustur, ka khyndew ka shyiap jong ka jaitbynriew.“Ki paidbah kin hap ban pyrkhat, hato kin aiti noh ia ka bor rangbah shnong, hima, elaka sha ka sorkar jylla lyngba ka article 371 ne kin bat hi halade ia ka kam synshar khadar katkum ka riti dustur,” ong u bah Pala.