Kop u bah Lambor ia u Bah Ardent ban iatainia halor ki kam pynroi ha Nongkrem

U MDC ka Nongkrem u Bah Lambor Malngiang ula kob ban iatai nia bad u MLA ka Nongkrem u Bah Ardent Miller Basaīawmoit uba long ruh u President ka Voice of the People Party ban pynshisha mano napdeng ki jong ki ba la wanrah bun ki kam pynroi kynthup ki surok bad kiwei hapoh ka Constituency. Kane ka jingkob u Bah Lambor ban iatai nia ka dei halor ka video ba la kren da u Bah Ardent ha kawei ka jingïalang ha Ri Lum Jaiñtia ha kaba ula ong, ba u iohi ia ka jingleit pynbha surok u Bah Lambor lyngba kawei ka lad pathai khubor. Ki la bun kiba kynthoh ba shano u jah bad ba ki surok ha Nongkrem Constituency ki sniew bad bun ki kynnoh ba ula lap miet leit ïalap ilekshon bad klet ia ka Constituency. Shuh shuh u Bah Ardent ula ong ba u khlem klet ia ka Constituency bad ki paidbah ki dei ban wad jingtip balei ki surok ki sniew ha Nongkrem bad bynrap ha ki 10 snem ba u long MLA kata naduh 2008 haduh 2018 ula wanrah shibun tylli ki surok hynrei ha ki 5 snem ba u khlem shah jied kum u MLA kata naduh u 2018 haduh u 2023, ym don kano kano ka jingsumar ia ki surok bad kumta ki sniew lut.

U Bah Ardent ula kynnoh ruh ba u Symbud Myntri Rangbah ba dei peit ia ka tnad PWD (Roads ) u Bah Prestone Tynsong ula kren ba ia ki jingïarap yn ai tang sha kiba don ha ka Sorkar bad pyntyrkhong ia kiba don ha ka Liang Pyrshah khamtam kiba dei na ka Voice of the People Party. Ha kaba ia dei bad ka jingkren jong u Bah Ardent, na ka liang u Bah Lambor Malngiang haba kren bad ki lad pathai khubor hynne ka sngi ula ong, ba ka jingkam u MLA ka Nongkrem ba ula wanrah ia ki surok ha ki jaka bapher ha ki 10 snem hynrei ha ki 5 snem pat ym don jingmoramot ka long ka bym iahap satia, namar ha ki 10 snem ba long MLA u Bah Ardent ka rukom shna surok ka long kaba torti ka jingstang ka rong ba siang ka long kum i snep rynsun. Ula bynrap tang hapoh 1 snem baroh ki surok ki la khoh lut kumta haba u long kum u MLA naduh u 2018 haduh u 2023 ula hap ban pyntrei biang ia ka surok na Liewlong sha Rngishillong ka ban poi sha Upper Shillong.

Ula ong, kum u MLA ula wanrah ia ka surok Laitkor-Pomlakrai- Laitlyngkot, ka surok na Lad Smit sha Smit ter ter, ka surok na Lad Nongkrem- Nongkrem-Umphrup-Smit bad kiwei. Kumta u bah Lambor ula kob ban tainia ia u Bah Ardent halor ki kam pynroi ha Nongkrem Constituency mano ba la ai kham bun bad ban pynshisha da ki kot ki sla. “Ki aplikeshon na kiwei ki MLA ka VPP ki poi sha kamra u Myntri Rangbah katba na Nongkrem Constituency ym don eiei” ula bynrap.