Ka State University ka jingkular ban kyntiew ia ki samla pule ha Jylla: Conrad

U Myntri Rangbah ka Jylla u Conrad K Sangma hynne ka sngi ula plie ia ka State University kaba nyngkong ha ka Jylla kaba la tip kum ka Captain Williamson Sangma State University. Ka sorkar jylla ka la mynjur ha u snem 2018 ban tei ia kane ka State University kaba kot T.16.96 klur bad ia ki jingtei jong kane ka University la plie ha u Kyllalyngkot 2023. Ha kane ka jingialang la iadonlang u Deputy Speaker ka iingdorbar thawain ka jylla u Timothy D Shira, u Myntri ka pule puthi u Rakkam A Sangma, ki MLA kiba kynthup ia u Sanjay A Sangma, Ian Botham K Sangma, Subir Marak, Sengchim Marak, Jim Sangma, Limison Sangma, Marthon Sangma, ka Vice Chancellor jong ka Captain Williamson Sangma State University ka Prof. Vasanthi Vijayakumar, u CEM ka GHADC u Albinus Marak bad u Deputy CEM u Nikman Marak bad kiwei kiwei. 

Ka University Grants Commission (UGC) kala ithuh ia ka Captain Williamson Sangma State University katkum ka kyndon 2(f) jong ka  UGC Act 1956 lyngba ka shithi kaba la phah ha ka 6 tarik u Nohprah 2024. Haba kren ha ka jingialang u Myntri Rangbah ula ong “Kane ka University kan ym ai jingshakri tang ia ka Higher Education hynrei kan kyntiew ruh ia ki kam wadbniah bad ka jingwanrah ia ki buit treikam ba thymmai, kaban wanrah ia ka jingkylla ha ka kam pule puthi hapoh ka Jylla”.“La palat 50 snem, ka jylla kam shym la don ia la ka jong ka State University, kumta ka jingseng ia ka University ba pyniaid hi da ka Sorkar Jylla ka dei ka jingpynshisha ia ka jingshim khia jong ka Sorkar ban kyntiew ia ka roi ka par ha ka pule puthi” ong u Conrad bad ka bynrap, “Ka University kan ym dei tang ka kyrteng, hynrei ka dei ka jingkular. Ka jingkyrmen, ka jingkiew shaphrang, ki lad ki lynti ki bym lah niew na ka bynta ki paidbah ka Meghalaya”.

U la pynbna ruh ba ka Sorkar kan sa pynkha sa ia ka Shillong Campus jong ka University, kaban iarap ha kaban pynsuk ia ka jingtreikam bad kumjuh ruh ia ki samla pule ka Ri-lum Khasi bad Jaintia. U Conrad ula ong ba kane ka skulbah kan sdang treikam noh naduh mynta bad baroh ki College hapoh ka jylla ki lah ban jied ban pyniasoh bad kane ka State University ban pynthikna ba ki samla pule kin ym donkam shuh ban iakhun ia ka Common University Entrance Test (CUET) bad ka CUET kan treikam tang ha ki College kiba pyniasoh bad ka skulbah North Eastern Hill University (NEHU), Shillong.w