Ki Kor teknoloji kin wanrah jingkylla bad kyntiew ia ki samla pule: Conrad

U Myntri Rangbah ka jylla u Conrad K. Sangma ryngkat bad u Lamphang ka iingdorbar thawain ka jylla u Thomas A Sangma hynne ka sngi ki la sam ia ki M-Tab ia ki samla pule ka West Garo Hills ha ka prokram kaba la pynlong ha District Auditorium, Tura. Haba ai jingkren Conrad Sangma ula ong ba kane ka Tablet kam dei eh tang ka tiar teknoloji hynrei ka dei ka atiar ban pynkupbor ia ki samla pule bad ka sorkar ka kwah ban pynthikna ba ki samla kin ioh ka lad ban pule bad ban don ia ki tiar ba kin pyndonkam ha ka jingpynkhreh ban iakhun ia ki eksamin bapher bapher.

“Kane ka prokram ka pyni katno ngi don ia ka jingpyrkhat na ka bynta jong phi bad ban tip katno ngi shaniah ha phi” la ong u Myntri Rangbah bad bynrap ba ki kor ki bor ki wanrah ia ki jingkylla ha kiba bun ki bynta ha ka jingim. Ka sorkar ka kwah ha kano kano ka lynti dei ban pynkhlain ia ka jingpyndonkam ia ki kor teknoloji ban pynthikna ba ngin lah ban pynlong ia ka jingpule kaba don ia ka jingkylla ban kyntiew ia ki samla pule ha Jylla. U la ong ba ka sorkar ka ngeit katba nangpyndonkam ia ka teknoloji ha ki shnong ki thaw, ki Smart Classroom, kumta ka ‘Digital Learning’ kan ai jingiarap ia ki samla pule tangba dei ban kynmaw ba ka tiar teknoloji ka long ban plie lad bad pynsuk ia ka rukom pule puthi.

U Myntri Rangbah ula iathuh ka sorkar ka la shimkhia ban kyntiew ha ka liang jong ka IT ha jylla ban thaw ia ki IT Park ha Shillong bad Tura bad ka jingpyniaid ia u Optical Fibres. Ka jingsam ia ki M-Tab ka dei lyngba ka Chief Minister’s Student Digital Learning Scheme halor ka jingthmu ban kyntiew ia ka pule puthi lyngba ki kor ki bor ha ka jylla. Kumba 1 lak tylli ki Tablet la sam naduh u snem 2021 sha ki khynnah pule XI. Katkum ka jinglum jingtip ka Directorate of School Education and Literacy ha u 2023-24 palat 30,480 ngut ki samla pule ki la ioh jingmyntoi na katei ka skhim.