Pynshlur u Myntri Rangbahduh ia ka jylla ban pynkhlain ka jingiadei bad ka Japan: Conrad

U Myntri Rangbah ka jylla Meghalaya Conrad K. Sangma hynne ka sngi ula iashim bynta ha ka 5th India-Japan Conclave ha nongbah Guwahati bad ula pynpaw ba ka jylla ka la shim ia ki sienjam  ban kyntiew ia ka jingiatrei lang bad ka Japan.Ula ong ba u Myntri Rangbahduh ka ri u Narendra Modi ula shim ïa kawei pa kawei ka sienjam ban pynthikna ba ka nongrim kaba la buh hapdeng ki ar tylli ki Ri kan ai jingmyntoi ïa baroh ar na ka bynta ka roi ka par ka ioh ka kot bad ka jingïohi jngai jong u Myntri Rangbahduh ka ri, ka la pynshlur ïa ka jylla Meghalaya ban shim kabu ïa ka jingïadei kaba khlaiñ bha bad ka ri Japan. “Ngim dei ka jylla kaba heh, hynrei ngi don la ka jong ka bor bad ka lad ka lynti. Ngi la pynleit jingmut ban jam shakhmat ha ka lynti jong ngi. Ngin sa leh katto katne ki kam bad ngin da leh bha ruh” la ong u Conrad haba kren ha ka jingialang.

Ula pyntip ba katto katne ki Nurse na ka jylla ki la shah thungkam ha ri Japan bad ka sorkar jylla ka la plie ia ka lad ka lynti da ka jingdon ia ka thong ban hikai haduh 3,000 ngut ki Nurse ha ki snem ban wan. U Conrad ula ong haba ki Agency thungkam ki kwah ban thungkam ïa ki nurse na Meghalaya, ki samla ki la sheptieng, ki kmie ki kpa ki la khuslai ïa ka jingshngaiñ jong ki khun bad bun ki la don ruh ia ka jingsngewkhia halor ka jinglut jingsep na ka bynta ka jinghikai ia ka ktien Japan, hynrei ka sorkar jylla mynta ka ai jingkyrshan pisa na ka bynta ka jinghikai bad pynthikna ia ka jingshngain jong ki samla ba shah thungkam ha ki Agency ba kin leit trei ha ki jaka sumar kiba don ha ka ri Japan.

 “Ha kaba nyngkong, ki samla kim shym la shaniah ïa kine ki Agency thungkam namar ba ka jinglut jingsep ha ka jinghikai ka long kaba heh, hynrei ka sorkar jylla kala tuklar bad pynbeit ia katei ka jingeh. Ngi lah siew mynta ïa ka bai hikai bad ban pynthikna ïa ka jingshngaiñ jong ki samla ki jong ngi,” la ong u Myntri Rangbah. U la iathuh ba lade hi ula leit sha ri Japan ban leit buh ia ka kynhun kaba nyngkong jong ki samla ba shah thungkam ha Japan bad mynta kila don  50 ngut ki nurse na ka jylla Meghalaya, kiba la trei ha kylleng ki jaka jong ka ri Japan katba 500 ngut ki dang pule ia ka ktien Japan bad ula ong ba kane ka jingkheiñ kan kiew sha ka 3,000 ngut bad ka lah ruh ban poi sha ka 5,000 ngut ha kine ki 4-5 snem kiban wan.