Na 29 ngut ki MDC, bam smai u MDC Sohra da ka ktien Khasi

Ka Deputy Commissioner ka East Khasi Hills ka kong Rosette Marry Kurbah hynne ka sngi ka la pynbam smai ia ki 29 ngut ki Member of District Council (MDC) ka Khasi Hills Autonomous District Council (KHADC) hapoh ka iing dorbar ka Council. U MDC ka Lyngkyrdem-Laitkroh u bah Shemborlang Rynjah u ban shimti kum u Chief Executive Member (CEM) ka KHADC ula bam smai nalor kiwei pat ki MDC. Kine kiba shah pynbam smai kum ki MDC ki kynthup ia 17 ngut na VPP, 5 ngut na ka UDP, 4 ngut na ka NPP, uwei na ka HSPDP bad ar ngut ki MDC shimet.

Napdeng kine ki 29 ngut ki MDC, 4 ngut ki dei ki kynthei kiba la shah jied kum ka MDC ba kynthup ia ka Kong Grace Mary Kharpuri na Nongshken, Kong Rona Khymdeit na Nongpoh, Kong Aibandaplin L Nonglait na Mylliem bad Kong Deity Majaw na Malki-Laitumkhrah konstiwensi. Ha kane ka jingpynbam smai baroh ki 28 ngut ki MDC ki la shim ia ka jingpynbam smai ha ka ktien nongwei katba tang u bah Titosstarwell Chyne uba bam smai da ka ktien Khasi.

Kum ban shu kdew ha kane ha ka ilekshon kaba dang shu dep shen, ka seng Voice of the People Party (VPP) ka la jop 17 ngut, katba ka UDP ka jop 5 ngut, ka NPP 4 ngut bad ka HSPDP uwei bad 2 ngut ki kyrtong shimet. Ka VPP kan synshar marwei ha ka KHADC kaba don 30 ngut ki MDC, katba kiwei ki party kin shong ha ka liangpyrshah.