Kren kyllaiñ u CE ia ka T.336 klur ba pynbna u Mntri na bynta ka skhim JJM:KJGC&SA

Ka kynhun jong ki nongtrei kontraktor hapoh ka Khasi Jaintia Government Contractor & Supplier Association, ki la pynpaw ka jingsngewkhia halor ka jingbym ioh jingshai ia ka Bill ba ki la trei hapoh ka jingpeit ka tnad PHE.
U Vice President ka seng u bah J.T.S Thongni ula ong ba hadien ba la iohi ha ki lad pathai khubor ba u Myntri ka PHE ula pyntip ba la ioh kumba T.336 klur na ka sorkar India na ka JJM, ki la kynduh ia u Chief Engineer ka PHE, hynrei ki la sngewdiaw ban ioh ia ka jubab bym shai ka bym sngewthuh bha bad kaba kyllain jalebi.
U la ong ba katkum ka jingkren u CE, kane ka Bill ka dang long kumba don sha khlaw sha jngai bah bad la pyntip ruh ba ka dei jong u snem 2026-27 bad ka pisa kan poi lada ki lah na ophis ban pynbiang ia ki jnit ki jnat.
“Na ka liang ki kontraktor ngi sngewdiaw shibun eh namar ngi la mad shibun ki jingeh ha kaba don napdeng jong ngi kiba bah da ka ram ka shah. Ia ki jingtrei ngi la pyndep hok kumba la phah iangi ban trei, hynrei na ka liang ka sorkar ka khlem lah ban siew ia ka bainong bad ia ka hok jong ngi,” ula ong.
Kane kala pynshaiong ia ki kontraktor namar ba kila khmih lynti ba kan dei ka Bill ban siew ia kaba kila dep trei kaba dang sah da ki spah klur bym pat ioh.
U la ong ba na ka liang ka kynhun kan sa shong pyrkhat ia ki sienjam ban shim bad kan ym shong kli kti ban shu shah pynbiej ha kane ka sorkar.
U la kyntu ia baroh ki kontraktor ba kin shong pyrkhat ia ki sienjam ban shim namar ka jingiakynduh jong ki hynne ka sngi , kam shym la pynhun eiei ia ki.
“Kine ki jingleh ka sorkar bad ka tnad ka la pynartatien shibun eh iangi ki kontraktor, ngi trei na bynta ki kam u paidbah bad ka um ka la poi ha man ka rympei iing ha ki shnong ki thaw, hyrnei haba ngi dawa ia ka bainong lajong ka sorkar kam shym la ai,” ula bynrap.