Jurip u MLA ïa ka projek ba T.18 klur ban ïada ïa 3 tylli ki shnong na jingbam ka Wah Umngi

Hadien ba la ioh ia ka jingujor na ki nongshong shnong ka thain halor ka jingbym sngewhun ia ka rukom pyntrei ia ka projek ba T.18 klur ban iada ia ki lai tylli ki shnong kiba hap hapoh ka South West Khasi Hills District na ka jingtwa ka khyndew na ka daw jong ka jingbam ka Wah Umngi, u MLA ka thain, Bah Pius Marwein ha ryngkat ki heh ophisar ka Brahmaputra Board, ka tnat Water Resources bad ka Water Commission ha ka Sngi Saitjain ki la hiar ban jurip ia ka jingpyntrei ia katei ka projek. Kitei ki lai tylli ki shnong kiba hap ha South West Khasi Hills District kiba la don mynta hapdeng ka jingma na ka jingshah kit bad shah rong noh ha ka Wah Umngi ki kynthup ïa ka shnong Mawshylliah, Moilam bad ka shnong Jamadwar.  U bah Vicky Wahlang uba shong basah ha Mawshylliah u la pyntip ba hadien ba ka Brahmaputra Board ka la iada ia ka shnong Balat, ka Wah Umngi ha kine ki ar snem ba la dep ka la pynjot pat sa ia ka shnong Mawshylliah, Moilam bad Jamadwar ha kaba ka jingtwa ka khyndew ka long palat ia ka san haduh hynriew phut ha ka shi aiom lyiur.

U General Manager jong ka Brahmaputra Board, u A. Kumar u la ong ba ka thong ba hakhmat eh jong kane ka jingjurip ka long ban pynlong ia kane ka projek kaba kham paka ha kaba ka Board ka la shim ruh ia ka jingai jingmut jong ki paitbah nongshong shnong katei ka thain. “Kane ka dei ka technical committee bad ngin sa shim ia ki lad ki lynti khnang ba ngin lah ban pynbha shuh ia ki jingiada kiba ngi la dep shim haduh mynta khnang ba kan long kaba kham kham neh bad myntoi”, u Kumar uba la bynrap ba ka Board ka buh thong ban pyndep ia ka projek hapoh ka por ba la buh ha u snem 2026. U MLA ka thain u Bah Pius Marwein u la pyntip ba ka jingpyntreikam ia kane ka projek kaba Ts.18 klur ka iaid shait shait tangba ki don ki jaka ba ki nongshong shnong kim sngewhun, namar ba ka jingpyntreikam kam iaid katkum ka jingpynkhreh ia ka DPR.

“Ngi la ïakren sani bha bad na ka liang ka Brahmaputra Board ka la mynjur ban pynkylla ïa ka rukom pyntrei ïa ka projek ha ki katto katne ki jaka katkum ka jingdonkam, bad shen kin sa iashong pyrkhat ban pan mang tyngka biang namar ba ka pisa ba la mang kam pat biang satia,” ong u bah Pius.U bah Pius u la pyntip ruh ba ka projek kaba T.10 klur ban iada ia ka shnong Balat mynta ka la dep bad kumba long mynta ka Balat kam shym la shah ktah shuh, hynrei ka wah kaba khlain bor ka la pynjulor sa ia kiwei pat ki shnong ba marjan.