Dawa iehnoh kam Pro Vice Chancellor ka NEHUTA ia ka Dr Fameline K Marak

Ka North-Eastern Hill University Teachers’ Association (NEHUTA) ryngkat bad ka Non-Teaching Staff Association (NEHUNSA) hynne ka sngi ki la pynlong ia ka jingialang hakhmat ophis treikam u Vice Chancellor ka NEHU bad pynpaw ka jingsngewnguh ia ka Prof Sherwin Sungoh ba la iehnoh ia ka kam kum ka Pro Vice Chancellor bad shimti noh kum ka Acting Vice Chancellor jong ka skulbah. Kine ki ar tylli ki seng ki la pynbna ruh ha ka jingialang ban ai kyrshan ia ka Prof Sherwin kaba la shimti kum ka Acting Vice Chancellor halor ka nongrim ba ka dei ka Professor ba la rangbah tam ha ka kam, katkum ka 2(A)(5)(i) jong ka skulbah.

U President ka NEHUTA u Prof. Lakhon Kma ula ong, ba ki seng ki ai jingkyrshan ia ka Prof Sungoh ba kan pyndep ia ki kam ba ka shimti katkum ki jingbthah jong ka Ministry of Education kaba la ioh ruh ia ka bor ban trei kum ka Vice Chancellor ba pura jong ka skulbah. Ula pynpaw ruh ia ka jingkyrmen bad kane ka jingshimti ka Prof Sungoh kumta ki kam ki jam baroh kin long kiba iaid beit iaid ryntih noh hapoh ka NEHU bad ula pynshai ruh ba kam shym la don kano kano ka shithi kaba la ioh pdiang na ka Ministry of Education halor ka jingshimti ka Prof Sherwin kum ka Acting Vice Chancellor wat la ia ka shithi la dep phah naduh ka 9 tarik Iaiong, 2025.

U President ka NEHUTA ula pynbna ba ka Acting VC ka lah ban ai jingmynjur ia ka CAS, ban pynlong ia ka jingialang jong ka Finance Committee, Academic Council, Executive Council bad wat ban thungkam shipor kynthup ruh ia ka jingthung ia ki Pro VC.Nalor kane, u Prof Kma ula kyntu ia ka Dr Fameline K Marak ba kan iehnoh ne Resign noh na ka kam Pro Vice Chancellor jong ka NEHU Tura Campus.