Phah jingthoh ban ioh jaka na Phan Nonglait Park, ong u bah Prestone

U Symbud Myntri Rangbah ka jylla u Bah Prestone Tynsong ula kyntu ia ka Pine Mount School ba kan phah da ka jingthoh na bynta ban ioh jaka khyndiat na ka Phan Nonglait Park ia kaba ju khot mynshwa da ka Lady Hydari Park. U Bah Prestone ula kren ia katei hynne ka sngi, ha ka jingrakhe ka Pine Mount School ia ka Quasquicentenial Jubilee ne ka jingdap 125 snem jong kane ka skul kaba la seng naduh u snem 1881 ban shakri ia ki khynnah ha ka jingstad na bynta ka lawei. “Nga sngew kyndit ban iohsngew, ba la phah ia ka jingkyrpad sha ka sorkar jylla, lada lah ban ai jaka lem ia ka skul na ka Lady Hydari Park. Nga ai jingmut ia phi baroh, wan iakynduh ia nga, lehse ha kine ki khyndiat taiew kiban wan. Wan iakynduh ia nga ryngkat bad ki kot ki sla bad ki jingpynkhreh kiba biang kumta ngan sa shimkhia ia kane bad ka sorkar. Sngewbha leh ia katei” la ong u Bah Prestone ha ka jingialang, kaba la pynlong ia ki nongpyniaid skul bad ki khynanh skul ban ia risa jam haba kila iohsngew ia kane ka jingkyntu.

Haba phai sha ka jingrakhe ia ka jingdap 125 snem, u Bah Prestone ula ong, ba la sdang da kaba rit ia kane ka skul, hynrei mynta kala poi syndon sha ka kyrdan kaba heh bad ula pynpaw ruh ia ka jingsngew sarong ba kadei tang ka Pine Mount School na Meghalaya bad katto katne eh ki skul na ka thain shatei lam mihngi kaba la kynjoh ban poi sha ka kyrdan kaba 23. Ula ong, kane ka skul kala kyntiew shajrong ia ka kyrdan bad ia ka dur ka dar jong ka jylla Meghalaya bad kadei ban iai bteng ban leh bha shuh shuh ban poi syndon ha ka kyrdan kaba 10 hapoh ka ri baroh kawei. Katba u Rakkam Sangma ula ong, ba ka sorkar kala buh hakhmat eh ia ka pule puthi bad kala bhah bun ha ka mang tyngka na ka bynta ban pynbiang ia ki jingtei jong ki jaka pule.

U Bah Prestone Tynsong bad u Rakkam Sangma kila pyllait paidbah ia ka kot Souvenir jong ka skul Pine Mount, ha kaba la iadonlang u Nongaibuit ka tnad Pule Puthi u Bah HM Shangpliang, ka Deputy Commissioner ka East Khasi Hills ka Kong RM Kurbah kaba dei ruh ka khynnah skul barim ka Pine Mount, ki nonghikai, ki khynnah skul bad kiwei kiwei.